Претседателот на Владата на Република Македонија, Зоран Заев претпладнево се сретна со специјалниот претставник на Обединетите Нации во разговорите меѓу Македонија и Грција, Метју Нимиц.
На средбата било разговарано за можностите за придвижување на разговорите меѓу Македонија и Грција во врска со спорот што ги блокира евро-атлантските интеграции на Република Македонија.
Посредникот Нимиц ги поздравил демократските промени во Македонија, што отвораат можност за напредок на државата.
Специјалниот претставник на ОН, Нимиц, му честитал на премиерот Заев за неговите „отворени проактивни политики, со коишто демонстрира пристап на решавање на проблемите, во интерес на граѓаните на Македонија, но и на регионот“, информираат од владината слуба за односи со јавноста.
„Јас и Владата на Македонија сме определени кон чекори што ги решаваат проблемите на граѓаните на Република Македонија. За тоа водиме инклузивни политики и така ќе биде и со решавањето на ова прашање, што ќе го водиме исклучително транспарентно, а не затворено како досега, само преку државен консензус, со опозицијата, со парламентот, со претседателот на државата и со граѓаните на Република Македонија“, рекол премиерот Заев.
На средбата заеднички било заклучено дека евро-атлантските интеграции се потребни за стабилноста и безбедноста на целиот Западен Балкан, но и дека тоа ќе придонесе за потребниот економски развој на државите и подигнување на квалитетот на живот на граѓаните. Оценето е дека постои позитивна клима за нов импулс во развојот на добрососедските односи, преку чекорите за зголемување на довербата меѓу државите, што може да придонесе и во продолжувањето на процесот на преговори.
