Иако веќе заврши грејната сезона, Владата одлучи да му префрли на АД ЕСМ државна помош од буџетот во висина од 50 милиони евра (три милијарди денари). Одлуката за одобрување на финансиска помош за справување со енергетската криза била одобрена на владината седница на 28 април, објави Фактор.
„Со оваа одлука се одобруваат финансиски средства во износ од 3.000.000.000 денари на Акционерското друштво за производство на електрична енергија, Електрани на Северна Македонија, во државна сопственост, Скопје. Средствата од член 1 од оваа одлука ќе се обезбедат од Буџетот на Република Северна Македонија за 2023 година“, пишува во одлуката.
Иако властите во изминатиот период ја убедуваа јавноста дека енергетската криза е под контрола, и понатаму продолжува издвојувањето на вртоглави суми од буџетската поддршка. Последен пат повисока сума Владата му префрли на ЕСМ во последните денови од минатата година (25 милиони евра), а годинава се чинеше дека повеќе нема повеќе да има вакви „финансиски турбуленции“ и дека ќе следува период на стабилизација.
Уште повеќе ваквата сума доаѓа како изненадување, затоа што минатиот месец ЕСМ објави дека е остварена добивка од 41 милион евра за 2022 година и дека голем дел од државната помош што била одобрена минатата година не била потрошена.
Минатиот месец беше објавено и дека генералниот директор Васко Ковачевски ја депонира својата оставка до премиерот Димитар Ковачевски и дека на негово место ќе биде назначен Васко Стефанов.
– За 2022 година производството е зголемено за 26,7 отсто во однос на 2021 година. АД ЕСм досега произведе 44 проценти повеќе електрична енергија отколку во 2021 година – рече Ковачевски. Тој тогаш се пофали дека ЕСМ уривала рекорди во 2022 година, меѓу кои и рекордот за дневно производство од 22.933 мегават-часови во еден ден што е највисоко во последните десет години.
На 30 април заврши и потребата да се обезбедува електрична енергија по фиксна цена од 95 евра по мегаватчас за основните и средните јавни училишта, болниците и водоводните претпријатија, кои сега ќе треба да се снаоѓаат на слободниот пазар.
ЕСМ во февруари и март речиси не набави дополнителна електрична енергија од приватните снабдувачи, но затоа во април купуваше пет пати и тоа за вкупна сума од околу 5,5 милиони евра од различни понудувачи.
