Пакистански полицајци уапсиле 19 вработени на ресторан за брза храна, бидејќи одбиле бесплатно да им подготват хамбургери, пренесуваат локалните медиуми.
Вработените на синџирот за брза храна „Johnny & Jugnu“ во источната пакистанска метропола Лахоре, морале да ги напуштат кујната и своите клиенти и да поминат во затвор седум часа во текот на ноќта од саботата кон неделата.
„Ова не е првпат“, се наведува меѓу другото во соопштението на компанијата.
Според нив, инцидентот се случил кога вработените, главно студенти, одбиле да „подготват порачка за многу посебен гостин“.
Кога нечесната полициска постапка е откриена на социјалните мрежи, девет полицајци се суспендирани во понеделникот, објави на Twitter Инам Гани, началник на полицијата во Лахоре.
„Никој не е над законите“, објави Гани во својот твит.
Пакистанската полиција ја следи лоша репутација дека е корумпирана и дека нејзините припадници често од трговците бараат мито.
Пакистанскиот премиер Имран Кан повика на реформа на полицијата во провинцијата Панџаб и ги обвини тамошните политичари дека на водечките места во полицијата ги „вработуваат своите јатаци“ за преку нив да ги контролираат локалните полиции.
