Украинскиот претседател Володимир Зеленски денеска им се заблагодари на американскиот претседател Џо Бајден, Конгресот и американскиот народ за последниот пакет воена помош, овој пат вреден 250 милиони долари, и нагласи дека тој ќе ги покрие „најитните потреби на Украина“.
Зеленски на социјалната мрежа Х изјави дека дополнителните проектили и други компоненти за противвоздушната одбрана, противтенковското оружје, муниција, опрема за мини и друга опрема, што се дел од пакетот воена помош, ќе ги покријат најитните потреби на Украина.
„Американското лидерство во коалицијата од над 50 земји, кои обезбедуваат воена помош на Украина, е клучно за спротивставување на теророт и агресијата, не само во Украина, туку и во целиот свет“, напиша Зеленски.
Украинскиот претседател нагласи дека САД годинава обезбедиле 34 пакети воена помош во вредност од над 24 милијарди долари.
„Донесена е историска одлука да се обезбеди Украина со авиони Ф-16. Засекогаш ќе бидеме благодарни за сета оваа поддршка“, додаде Зеленски.
Тој заклучи дека за да се одбрани „слободата и безбедноста не само во Украина и Европа, туку и во САД“, Киев мора да продолжи да одговара на руските напади на „најсилен и најодлучен можен начин“.
Претходно во четвртокот беше објавено дека САД ѝ доделиле на Украина 250 милиони долари помош за одбрана. Тоа е последната транша од помошта достапна без ново гласање во американскиот Конгрес.
„Императив е Конгресот да дејствува што е можно поскоро за да ги унапреди нашите национални безбедносни интереси помагајќи ѝ на Украина да се одбрани“, напиша државниот секретар Ентони Блинкен во изјавата.
Во горниот дом на Конгресот, Сенатот, мнозинство е Демократската партија, чии редови се Блинкен и американскиот претседател Џозеф Бајден.
Претходно овој месец пакет од 111 милијарди долари помош за Тајван, Израел и Украина од кои 61 милијарда за Украина беше закочен од страна на Републиканците.
