Украина би сакала борбите со Русија да завршат што е можно побрзо за да се запре загубата на животи, изјави Володимир Зеленски.
Украинскиот лидер разговараше со кардиналот Пјетро Паролин, државен секретар на Ватикан кој беше во посета на Киев. Зеленски се заблагодари на Светата столица за „силниот сигнал“ за поддршка на Украина.
„Мислам дека сите ние разбираме дека треба да ја завршиме војната, што е можно поскоро, се разбира, да не ги загубиме животите на луѓето“, рече Зеленски.
Минатата недела, Зеленски изјави за Би-Би-Си дека се надева дека ќе стави крај на „жешката фаза“ на војната „до крајот на оваа година“ и дека никој не сака да продолжи конфликтот „уште десет години или подолго“.
Меѓутоа, во истото интервју тој појасни дека неговото решение е сојузниците на Украина на Запад да се согласат да ја поддржат неговата „формула за мир“ и да и ја претстават на Русија како обединет блок.
„Формулата за мир“ е список на барањата на Зеленски што првпат беа откриени во ноември 2022 година, почнувајќи од повлекувањето на Русија од сите територии што Украина ги смета за свои – вклучувајќи ги Крим и Донбас – исплата на репарации, судења за воени злосторства за руското раководство и членството на Украина во НАТО. Москва го отфрли како „надвор од реалноста“.
Еден месец пред да ја објави „формулата“, Зеленски потпиша и декрет со кој се забрануваат какви било преговори со Русија се додека претседателот Владимир Путин остане на власт.
Ненадејниот интерес на Зеленски за брзо завршување на конфликтот беше забележителна промена на тонот од март, кога папата Франциско го повика Киев да покаже „храброст на белото знаме“ и да преговара со Москва.
„Нашето знаме е жолто-сино“, одговори тогаш украинскиот министер за надворешни работи Дмитриј Кулеба. „Никогаш нема да креваме други знамиња“.
Папата Франциско минатата година даде и две понуди да посредува во конфликтот со Русија, но двата пати Киев го отфрли. Последното одбивање дојде во јуни, непосредно пред големата украинска офанзива која заврши со неуспех и имаше огромни жртви.
Зеленски можеби ја менува својата реторика поради стравувањата дека поранешниот американски претседател Доналд Трамп би можел да се врати во Белата куќа и да ја промени политиката на Вашингтон за безусловна поддршка на Киев, изјави во понеделник полскиот експерт за меѓународни односи д-р Витолд Сокала.
Русија постојано изјавува дека е подготвена да преговара за крај на непријателствата со Украина. Минатиот месец Путин наведе збир на услови за прекин на огнот, вклучувајќи Киев официјално да се откаже од аспирациите за НАТО, повлекување од руските региони и укинување на сите западни санкции кон Русија.
Мировниот план на Зеленски не е доволен за решавање на украинската криза
Украинскиот конфликт е сè уште далеку од решавање и дека предложената мировна формула на украинскиот претседател Владимир Зеленски не е доволна, рече кардиналот Паролин во средата во интервју за италијанскиот весник „Аввенир“.
„Ми се чини дека сè уште сме далеку од решението на конфликтот“, рече тој. „Имаме мировен предлог на претседателот Зеленски, кој Светата столица веднаш го поддржа, особено во сферата на хуманитарните прашања.
„Тоа претставува обид да се најде мир, иако има празнини во смисла да не се вклучи Русија. Овој план може да помогне, но не е доволен“, продолжи тој. „Се надевам дека ќе се најдат други формули за да се отвори патот за разговорите.
Државниот секретар на Светата столица, исто така, рече дека претходните изјави на украинскиот лидер во врска со намерата да ја покани Москва на следната мировна конференција е позитивен сигнал.
„Но, во целина, не знам дали Москва може да се убеди врз основа на оваа мировна формула на Зеленски“, рече тој. „Сепак, Москва мора да дојде на преговарачка маса, таа не може да отсуствува.
Според кардиналот Паролин, дипломатијата досега не успеала да понуди решенија. Тој истакна дека дипломатските напори бараат одредена „рамнотежа“, што значи да не се зазема „радикален став на едниот против другиот“.
Украина упати отворена покана до папата Франциско да ја посети Украина, но понтифот уште од самиот почеток јасно стави до знаење дека секоја потенцијална посета на Киев ќе биде проследена со посета на Москва.
