Украинскиот претседател Володимир Зеленски во обраќањето пред парламентот во вторникот предложи дека привремената руска контрола врз украинската територија е веројатно неизбежна сѐ додека рускиот претседател Владимир Путин е на власт.
„Украина можеби ќе мора некого да надживее во Москва за да ги постигне своите цели и да ја врати целата национална територија“, рече украинскиот претседател.
Во меѓународните медиуми веќе некое време се шпекулира дека војната во Украина може да биде замрзната по линијата на фронтот дури и ако Киев не ѝ отстапи територија на Русија. Зеленски во парламентот категорично ја отфрли можноста Украина формално да отстапи територија.
„Ние не се откажуваме од правото на Украина на нејзина територија“, нагласи тој.
Зеленски пред парламентот претстави план за зголемување на отпорот на Украина на рускиот притисок кој се фокусира на воените, економските и социјалните напори во Украина. Деталите ќе бидат познати во декември.
„Украинското оружје е една од главните гаранции за украинската независност“, рече Зеленски нагласувајќи ги огромните инвестиции во вооружување.
Украинскиот претседател рече дека следната година ќе бидат произведени 30.000 борбени дронови со долг дострел и 3.000 крстосувачки ракети. Се проширува и домашното производство на муниција, тврдеше Зеленски без да даде попрецизни податоци.
Планот на Зеленски за Украина дојде набргу откако тој го претстави „Планот за победа“ на своите западни сојузници во октомври, кој вклучуваше барање Украина да биде поканета да му се приклучи на НАТО.
