Претседателот на Европската комисија Жан Клод Јункер изјави дека излегувањето на Грција од еврозоната може да ја поткопа довербата во единствената европска валута.
– Не го делам тврдењето дека ќе имаме помалку грижи и ограничувања ако Грција се откаже од еврото – наведува Јункер во интервју за денешен Зидојче цајтунг.
Шефот на ЕК изрази став дека повлекувањето на која и да е држава од еврозоната ќе создаде впечаток дека еврото не е нешто незаменливо.
Тоа може да ги натера меѓународните инвеститори да се повлечат од Европа, предупредува тој.
Грција и кредиторите од еврозоната и ММФ со месеци водат преговори без признаци за конечно решавање на тоа прашање.
Јункер кој денеска ќе има средба со германскиот канцелар Ангела Меркел и францускиот претседател Франсоа Оланд вели дека Грција ќе биде на дневен ред на разговорите и покрај тоа што тоа не е официјален повод за нив. Тој го повика ММФ да го продолжи учеството во напорите за спасување на Грција.