После 66 дена рестриктивни мерки во државата имаме полоша здравствена и економска состојба од таа која ја имавме на моменти кога се воведуваа овие мерки. Ова подразбира дека системот не функционира, а владата не ги презема најефикасните методи за заштита на стандардот и здравјето на граѓаните, истакнa во средата на прес-конференција пред седиштетот на ВМРО-ДПМНЕ, лидерот Христијан Мицкоски.
Опозицискиот челник на почетокот посочи дека нема да зборува за здравствената состојба и оти тоа ќе го препушти на стручните лица од таа област, туку ќе се задржи на економијата, од каде што, како што оцени се добиваат „сѐ позагрижувачки податоци“.
„Од она што досега можеме да видиме е дека со првите два пакети на мерки не се помогна на бизнисот. Тие мерки се недоволни. Ненавремено преземени, а сето ова го потврдува и слабата половична и потпросечна искористеност. Повеќето средства отидоа кај големи компании додека средните и малите бизниси едвај преживуваат. Што се однесува до третиот пакет на мерки тоа е магла која владата ја сее пред избори. Тие говорат за пари, за средства кои не можат да ги исплатат и истите имаат манипулативна природа. Создаваат надежи кои не се во состојба да ги реализираат и од тука има една тажна но реална порака која секој бизнисмен ја разбира и си има работа со владата на Заев и Спасовски, а тоа е дека вистинска помош нема“, рече Мицкоски.
Истакна дека и покрај тоа што Владата троши големи суми, граѓаните и бизнисот не гледаат никаков бенефит од сето тоа и оти средаствата се потрошени непродуктивно.
„Нема ниту една компанија која е задоволна. Ниту еден единствен стопанственик кој објективно ќе го пофали ангажманот на владата. И состојбата не се подобрува, а тоа го говорат и најновите податоци кои ќе ги презентирам денес. Имено, во текот на вчерашниот ден министерството за финансии го објави практично Извештајот кој што опфаќа реализација на Буџетот во првите 4 месеци т.е. периодот први јануари – 30-ти април, 2020-тата година. Кога се уште ефектите од вирусот Ковид – 19 или корона пандемијата не се видливи во економијата“, рече уште лидерот на ВМРО-ДПМНЕ.
На почетокот се задржа на дефицитот при што потсести дека тој во во моментов изнесува рекордни 200 милиони евра или од прилика нешто повеќе од 12 милијарди денари.
„Како е тој дистрибуиран по месеци, во месеците јануари 20 милиони, во месеците февруари – март 50 милиони, и рекордни 80 милиони евра во месецот април. Тоа е доволен показател дека владата немала ниту во момент намера да помогне на граѓаните и бизнисот туку единствена цел била поткуп т.е. обид за поткуп и милост од граѓаните да го заборават сето она кое што беше погрешно направено изминативе три години пандемија под раководство на СДСМ и Зоран Заев“, рече Мицкоски.
Според него, само во првите четири месеци Влдата предводена од СДСМ го зголемила долгот на граѓаните за 1,8 отсто од бруто домашниот прозивод (БДП).
„Наместо да имаме намалување на јавниот долг ќе имаме зголемување на јавниот долг само во првите четири месеци од 1.8 отсто. Секое семејство го задолжија за од прилика 25.000 денари, само во првите четири месеци од почетокот на годината. А, кога зборуваме за долгот би сакал да потсетам дека обврските кои ги имаме по однос на заемодавателите од минатото, а до крајот на годината треба да се сервисираат во износ од прилика 30 милијарди денари или нешто помалку од 500 милиони евра. А, обврските по однос на планираниот дефицит кој што владата ќе го направи до крајот на годината, почнувајќи од први мај завршувајќи со 31 декември се нешто повеќе од 34 милијарди денари или нешто повеќе од 550 милиони евра што значи дека до крајот на годината се потребни околу 1 милијарда и 50 милиони евра за да бидат сервисирани обврските кон заемодавателите со цел задолжување заради раздолжување и обврските кои што треба да се сервисираат по основ на дефицитот кој што ќе го има буџетот до крајот на годината. Тука не се опфатени првите четири месеци, а дефицитот до крајот на годината е составен како резултат на збирот на планираниот дефицит на почетокот на годината и намалените приходи во Буџетот кој што ќе бидат до крајот на годината“, прецизираше Мицкоски.
Потсети дека со тоа не е опфатена помошта кон стопанството, како и помошта кон граѓаните, поради што според оцената на Мицскоски земјата ќе бележи дополнителен буџетски дефицит, или до крајот на годината зголемувањето на долгот, на јавниот долг во однос на БДП-то ќе изнесува точно 5 проценти. Односно, доколку се додадат на дополнителните 1,8 отсто во првите четири месеци од горидната, тогаш вкупниот зголемен долг на крајот од 2020-та без задолжувањето за помош на стопанството и граѓаните ќе изнесува околу 7 отсто од БДП или тоа е некаде околу 95 илјади денари зголемен долг за секое семејство, или 1500 евра зголемен долг за секое семејство само за една година.
„И третата е реализацијата на капиталните инвестиции бидејќи секаде ги гледаме од Владата со полна уста дека зборуваат за робусна и интензивна реализација на капиталните инвестиции тоа, нешто на кое ние како ВМРО-ДПМНЕ на почетокот од пандемијата, на почетокот од кризата силно апелиравме. Но кога станува збор за бројките тие се немилосрдни и го демантираат сето она кое што го зборува оваа лажлива Влада и функционерите кои што се именувани од оваа лажлива Влада.
А, какви се бројките? Во првите 4 месеци од 2020 година, во услови на техничка Влада реализацијата на капиталните инвестиции е околу 13 проценти од она кое што било планирано на почетокот на годината. Во 2019-тата година за истиот период реализацијата на капиталните инвестиции била 11.25 проценти, кога немаме техничка Влада. Да потсетам тоа е период кога исто така имаме изборен циклус, а тоа се претседателските избори. Во 2018-тата година реализацијата на капиталните инвестиции е 14.23 проценти. во 2017-тата година во истиот период, во првите 4 месеци кога исто така имаме техничка Влада, капиталните инвестиции се реализирани со интензитет од 27 проценти во однос на тие што биле планирани на почетокот на годината“, продолжи Мицкоски.
Спроед дека во 2016 година, кога исто така имаше техничка Влада, капиталните инвестиции се реализирани во износ од речиси 19 отсто од она што било планирано на почетокот на годината. Мицкоски посочи дека „разликата е евидентна и лагите се распрснуваат како меур од сапуница“, како и дека бројките се немилосрдни и ги !„демантираат лагите“ на оваа Влада предводена од ова раководство на СДСМ и Зоран Заев.
„Македонија преживува тежок период и со оваа власт нема да биде подобро затоа што не знаат, не умеат и немаат план. Ние сме различни од сето ова кое што е за жал наша денешна сурова македонска реалност. Нам интересот на граѓаните ни е пред и над се. Мора поинаку, мора подобро. На Македонија не и се потребни пакети за лажлив ПР туку вистинска помош на стопанството и оддржлива стратегија. Не и се потребни еднократни ад хок мерки туку сигурност план и стратегија. Ние тој план го имаме и тој план го понудивме на граѓаните, а на следните предвремени парламентарни избори повторно ќе го понудиме. На Македонија и е потребна обнова во секоја пора во ова општество и нова енергија која ќе ги решава вистинските проблеми. Имаме стратегија, а економијата мора да се развива, средствата да се трошат наменски со вистинска цел за развој на нашата држава. Гаранција за сето тоа е обновата која ќе ја започнеме и за која заедно со народот на следните предвремени парламентарни избори ќе ја победиме оваа три годишна пандемија предводена од ова раководство на СДСМ и Зоран Заев“, заклучи Мицкоски.
