Американскиот актер Ричард Чембрлен, кој најпрво стана познат по драмската серија од 1960-те „Д-р Килдер“ а подоцна стекна обожаватели за неговите главни улоги во популарната серија „Шогун“ и „Птиците умираат пеејќи“ почина на возраст од 90 години на Хаваите.
Неговиот публицист рече дека актерот починал по компликации од мозочен удар, објавија американските медиуми.
Џорџ Ричард Чембрлен е роден во Беверли Хилс, Калифорнија на 31 март 1934 година. Татко му бил продавач, а мајка му домаќинка. Во едно интервју тој изјави дека растејќи бил повеќе „исплашен“ отколку срамежлив.
„Не го сакав вистинскиот живот, но филмовите, еј, ми се допадна киното и таму сакав да бидам. Ионака секогаш глумев и се преправав дека сум некој друг“, изјави свеовремено за американските медиуми.
Популарноста ја стекна преку ноќ со улогата на докторот Килдер во истоимената серија од 1961 година кога имаше само 27 години и стана тинејџерски идол и секс симбол.
Со сини очи и со порцеланска кожа, Чембрлен ретко беше миленик на критичарите во неговите најдобри години. Магазинот People еднаш ја сумираше неговата актерска репутација како „згоден, но без страст“.
Но, со текот на годините, тој се обиде да ја поправи својата лоша репутација глумејќи во англиските театри, играјќи ги Хамлет и други шекспировски ликови, а потоа мафтајќи со самурајски меч во серијата од 1980-те „Шогун“ (1980). Во Англија, каде што се усовршуваше, се здоби со респектабилна актерска репутација.
Но тој беше најпознат меѓу обожавателите по улогата на католички свештеник кој се бори со забранетата љубов во една од најгледаните мини-серии на сите времиња, „Птиците умираат пеејќи“ од 1983 година, базирана на романот на Колин Мекалоу.
Тој го играше Ралф де Брикасарт, свештеник растргнат помеѓу неговиот завет на целибат и неговата љубов кон младата нему сродна душа, Меги Клири, која ја играпе Рејчел Вард. Оттогаш, таа стана речиси незаменлив дел од телевизиските серии.
Пред тоа, во 1970-те, глумеше во филмови како „Тројцата мускетари“, „Четворицата мускетари“, „Грофот Монте Кристо“ и „Човекот со железна маска“, а се шегуваше дека станал „чудовиште во наметка“.
Во стварниот живот Чембрлен долго време се обидуваше да ја скрие својата хомосексуалност, тајна за која се плашеше дека може да му ја уништи кариерата.
„Добивав и до 12.000 писма од обожавателите неделно. И сите беа заинтересирани за мојот љубовен живот, но вешто го криев долго време”.
Се ближеше на своите седумдесети години кога јавно се декларираше како хомосексуалец во неговите мемоари од 2003 година, под наслов „Shattered Love“. Тој со децении живееше на хавајскиот остров О’аху со својот партнер, режисер и продуцент Мартин Рабет.
