Две жени го извршиле денешниот напад врз американскиот конзулат во Истанбул. Едната од нив е уапсена, потврдено е од кабинетот на гувернерот во Истанбул, а за нападот е обвинета радикалната марксистичка група Револуционерен народен ослободителен фронт (DHKP-C).
Една од жените е идентификувана како 42-годишна Хатисе Асик и е припадничка на забранетата DHKP-C.
Од кабинетот на гувернерот е соопштено дека полицијата е во потрага по друга жена која учествувала во нападот.
Во претходен извештај се наведува дека нападот врз американскиот конзулат во Истанбул го извршиле маж и жена и оти никој не е повреден во тој напад, што уследи неколку часа по бомбашкиот напад врз полициска станица во истиот град, во кој се убиени тројца напаѓачи и еден полициски службеник, а ранети се десет лица.
Истанбулската полиција потврди во соопштение дека тројца полицајци и седум цивили се ранети во експлозијата.
Германското МНР предупреди на можни напади во Истанбул
Министерството за надворешни работи на Германија претходно предупреди дека се можни напади во Истанбул на подземната железничка мрежа и автобуските станици, откако турските сили извршија напад врз курдските милитантни активисти во северен Ирак.
Можни се засилени напаѓачки активности на милитантната Курдистанска работничка партија (ПКК), се наведува во соопштението објавено на веб страната на германското МНР, пренесува српски „Блиц“.
Инаку, поради стравот од напади во Истанбул и воопшто во Турција, бројот на странски посетители во Турција опадна за 2, 25 отсто на 14, 89 милиони лица во првите шест месеци годинава. Ова го покажуваат податоците што денес ги објави Министерството за туризам во Анкара.
Предупредување и од турското министерство за правда
Турското Министерство за правда испратило писма до сите судски институции во земјата во кое ги предупредува за опасност од нови терористички напади во Турција.
Наводно, предупредувањето следи по разузнавачка информација, според која е можно судовите да бидат следна мета на нови напади во Турција од страна на „сепаратистичка терористичка организација“.
Воедно Министерството за правда минатата недела ги предупредило магистратите и за потенцијална опасност од киднапирање на државни службеници.
Терористите уништија гасовод
Група терористи вчера изврши нов напад во Турција – уништен беше дел од гасовод во турскиот округ Агра кој се наоѓа на околу 15 километри од границата со Иран.
Предивикан бил голем пожар кој навреме е изгаснат. Преносот на гас низ системот е прекинат, се додава во извештаи на медиумите во Турција.
Вонредна НАТО седница за Сирија
Вонредна седница на НАТО, на која главна тема беше Сирија минатиот месец беше одржана по барање на Турција.
Анкара на тој потег се одлучи откако воената авијација почна со воздушни удари врз позиции на Исламска држава и курдски бунтовници во соседна Сирија. Во соопштението на НАТО се вели дека Алијансата „многу внимателно ќе ги следи случувањата и ќе биде солидарна со Турција“.
Турција удри врз Исламска држава
Турски воени авиони претходно ја нападнаа Исламска држава. Авионите извршиле бомбардирања на цели на ихадистичката група на подрачјето на Сирија.
Телевизијата ТРТ објави дека четири борбени летала, полетале од базата Дијарбекир, во југоисточна Турција, и извршиле ракетен напад врз сириското село Хавар, кое се наоѓа непосредно до граничната линија со турската провинција Килис.
Кабинетот на премиерот на Турција, Ахмет Давутоглу, испратил соопштение до јавноста во кое е наведено дека авиони од типот Ф-16 во петокот утрината бомбардирале три локации на Исламска држава во северна Сирија.
Оваа акција на турската армија се случуваше по нападите наџихадистите на позиции на војската на Турција долж границата.
Исламка држава се смета за одговорна за нападот кој беше извршен овој месец во турскиот град Суруч, при што загинаа 32 лица, а најмалку 100 беа ранети.
