Преседателот на Гватемала, Џими Моралес, објави во неделата дека донел одлука да ја пресели амбасадата на неговата земја во Израел од Тел Авив во Ерусалим, следејќи ја истата одлука којашто во првата седмица од декември ја донесоа САД.
„Денеска (недела) разговарав со израелскиот премиер Бенјамин Нетанјаху… Една од важните теми беше враќањето на амбасадата на Гватемала во Ерусалим. Објавувам дека му дадов инструкции на министерот за надворешни работи да започнат соодветните активности, за остварување на одлуката“, напиша претседателот Џими Морале с на својата страница на Facebook.
На 6-ти декември американскиот претседател Доналд Трамп објави дека го ефектуира законот донесен во 1995 година за признавање на Ерусалим за престолнина на Државата Израел и го потпиша документот за преселување на американската амбасада од Тел Авив. Одлуката на американскиот претседател беше со одушевување во Израел но предизвика жестоки реакции во арапскиот и муслиманскиот свет, но и многу земји американски сојузници.
Откако САД во Советот за безбедност на ОН ја блокираа предлог-резолуцијата подготвена од Египет со којашто се осудува американската улога и се потврдува статусот на Ерусалим, Генералното собрание на ОН минатиот четврток ја изгласа резолуцијата за непризнавање на САД. Притоа, од 193 земји и територија, 128 земји гласаа „за“, девет беа „против“, а 35 земји беа воздржани.
Резолуцијата не ја поддржаа САД, Израел, Ходурас, Гватемала, Микронезија, Маршаловите острови, Науру, Палау и Того.
