Автомобил на тетовец бил оштетен од заскитан куршум, вчера на регионалниот пат Тетово- село Јажинце, информираше МВР.
Случајот во полиција го пријавил Р.М. (42) од Теарце, според кого инцидеентот се случил околу 22.20 часот. Тогаш тој со својот автомобил „фолксваген пасат“ се движел кон Теарце, кога слушнал силен удар на кровот. Тој излегол од возилото и забележал дека е оштетено од заталкан проектил од огнено оружје.
Увид на местото на настанот извршила екипа од СВР Тетово. Се преземаат мерки за расчистување на случајот.
Од полицијата информираат дека вчера во 22.10 часот било пријавено нарушување на јавен ред и мир со пукање од огнено оружје во населба Дреновец во Тетово. Полициски службеници извршиле проверка и констатирале дека било пукано на свадбена веселба во куќа сопственост на М.Л. (47) во село Порој. Тој изјавил дека некој од присутните гости испукал неколку истрели.
На местото биле пронајдени четири чаури од пиштолска муниција. Се преземаат мерки за целосно расчистување на случајот.
