Куќа на стравот, живи статуи, изложба на хорор-фотографии и други ѓурултии ќе можат граѓаните да видат во културниот центар „Дуња“, по повод Денот на вештерките.
Не, во Скопје следната недела не се случуваат само повампирените локални избори, туку граѓаните ќе можат да уживаат во еден оригинален перформанс за 31 октомври – Денот на вештерките. Културниот центар „Дуња“ кој се наоѓа на Рајко Жинзифов 22, негде спроти Градежниот Факултет, ќе организира театарски игри, куќи на стравот, живи статуи, слики од познатите хорор имиња … а, секако ќе носите и маска против ковид-19 по сите протоколи.
Еве како самите организатори го опишуваат настанот:
„Fifty Faces of Fear“ (FFF) е ново освежување во градот, настан кој не смеете да го пропуштите!
Се работи за мултимедијален настан креиран од Театарот „Златен Елец“, Cozmic Vizion и од Театроск,а ќе вклучува „Куќа на Стравот“, изложба на фотографии, актерски перформанс и живи статуи.
Нашата цел е да понудиме нешто ново на уметничката сцена, да се надоврземе на класичното и да го издигнеме на повисоко и модерно ниво, оттука креирајќи алтернативни начини на креативно изразување и презентирање.
Идејата се зачна по изработка на 50 дела кои ја обработуваат тематиката СТРАВ, изработени од Cozmic Vizion (Воислав Пехчевски и Емилија Апостолска). Соработката со Надица Петрова и Давид Илиќ од Театар Златен Елец и Милена С. Цветановска и Војо Цветановски од Театар Театроск, како и претстојниот интернационален празник „Halloween“ доведе до раѓање на идеја за формирање на овој уникатен настан.
Бидете и вие дел од ова екстремно искуство каде ќе бидете сведоци на единствената Куќа на Стравот во нашата земја, дружејќи се со Freddy Krueger, The Joker, Harley Quinn, Maleficent, The Nuns, Zombies, Witches, Vampires, Scary Clowns и други изненадувања.
Изложбата на фотографиите ќе трае и во наредните 2 дена (1 и 2 ноември) од 17 до 22 h, со можност за купување на вашата омилена фотографија“.
Влезниците за настанот се во ограничен број, а настанот не е препорачлив за луѓе со слабо срце, епилепсија и сите под 16 години.
Резервации можат да се направат на 075637244, 070859459 или на мејлот [email protected].
