За заштита на здравјето, како основно човеково право, неопходно е во креирањето мерки и политики да постои конзистентен пристап за зачувување на животната средина, унапредување на здравствениот систем и на лекарската професија, истакнува проф. д-р Калина Гривчева-Старделова, претседателка на Лекарската комора, по повод Светскиот ден на здравјето – 7 Април, чие мото годинава е „Наша планета, наше здравје“.
Таа посочува дека за унапредување на состојбите е неопходно поскоро да влезат во собраниска процедура и да бидат побрзо изгласани измените на Законот за здравствена заштита, со што ќе се регулира правото на дополнителна дејност, како и можноста матичните пациенти да се водат на здравствената установа, а не на матичниот лекар.
– Неопходно е побрзо донесување на измените на Кривичниот законик со кои нападот врз здравствен работник се смета за напад врз службено лице, што значително ќе придонесе за создавање на побезбедни услови на работното место. Законските измени подолго време без причина чекаат зелено светло од пратениците, поради што е потребно конечно да се заврши постапката на нивно донесување и да стапат во примена. Здравствениот систем не може да биде стабилен и одржлив доколку во него не ги задржиме младите лекари. За да се постигне тоа неопходно е да бидат мотивирани со подобрување на условите за вработување и работење, како и унапредување на знаењата и создавање можности за развивање на научната дејност. Законот за докторска дејност, исто така, е неопходно да стане дел од позитивните правни прописи, поради тоа што со него може да се направи баланс меѓу правата и обврските кои ги носи современиот начин на живот и начин на работа, истакнува проф. д-р Гривчева Старделова.
Таа посочува дека Лекарската комора во континуитет е во комуникација со сите надлежни институции и активно се залага за надминување на предизвиците и подобрување на состојбите. Очекува во претстојниот период да се постигне поширок општествен консензус и разбирање кај оние кои, како што вели, ги носат одлуките за потребата од процесирање на истакнатите забелешки.
– Патот на развојот на здравствениот сектор, како еден од главните општествени столбови, мора добро да се трасира и конзистентно да се работи на реализација на зацртаните мерки кои ќе имаат широк бенефит за здравствените работници и за пациентите, додава претседателката на Лекарската комора.
