Во главниот град на Кина, Пекинг, денеска започна тестирањето на милиони жители за Ковид-19 и затворањето на станбени и деловни квартови поради појавата на ново жариште на инфекција.
Иако помалку од 50 случаи на инфекција се пријавени во градот со повеќе од 21 милион луѓе, од избувнувањето во петокот, властите презедоа екстремни мерки за да спречат понатамошно ширење на вирусот.
Како мерка на претпазливост, граѓаните остануваат дома и складираат храна поради можноста да им се нареди да останат внатре, како што се случи во голем број кинески градови, вклучувајќи го и финансискиот центар на Шангај.
Долги редици се формираа пред супермаркети во центарот на Пекинг. Граѓаните купуваат ориз, тестенини, зеленчук и друга храна, додека вработените се обидуваат брзо да ги наполнат празните полици. Државните медиуми објавија соопштение во кое се наведува дека снабдувањето е добро во Пекинг и покрај налетот на купувачите.
Пекинг денеска пријави 19 нови случаи на зараза во претходните 24 часа, односно вкупно 47 од петок до недела.
Шангај, кој е во заклучување повеќе од две недели, пријави повеќе од 19.000 новозаразени и 51 смртен случај во претходните 24 часа, со што се зголеми бројот на смртни случаи во сегашниот бран на инфекција на повеќе од 100.
Заклучувања се воведени и во централниот град Ајанг и во градот Дандонг на границата со Северна Кореја, бидејќи омикронскиот вид на вирусот се шири низ Кина.
Границите на Кина остануваат главно затворени, а силната реакција на Кина на новиот број заразени расте и влијанието на пандемијата врз економијата на земјата расте.
