Превирањата во американскиот банкарски систем и зголемените стравови од рецесија ја спуштија довербата на светските инвеститори на едно од најниските нивоа во последните 20 години, покажа истражувањето на инвестициската банка BofA.
Месечното истражување по колапсот на американските „Silicon Valley Bank“ (SVB) и „Signature Bank“ и пред минатонеделното спасување на швајцарската банка „Credit Suisse“ покажа дека перцепцијата за нивото на ризик драстично се влошила.
Индикаторот за ризик на финансискиот пазар на BofA за нивоата на загриженост на инвеститорите скокна на 7,7 отсто, што го става малку под минатогодишното ниво по почетокот на руско-украинската војна и над нивоата во екот на глобалната финансиска криза и пандемијата. Менаџерите на европските фондови се особено песимисти.
Иако истражувањето е спроведено пред проблемите во „Credit Suisse“, речиси една третина од нив сметаат дека сегашниот најголем ризик за пазарот е системската кредитна криза. Во анкетата од февруари, уделот на оние кои очекувале ваква криза изнесуваше само осум отсто, што значи дека евентуална кредитна криза првпат по девет месеци ја измести инфлацијата од првото место. Испитаниците го наведуваат неформалниот банкарски сектор во САД како најверојатен извор на опасност.
И другите истражувања на јавното мнение дошле до слични заклучоци. Во Германија месечното истражување на институтот за економски истражувања ZEW покажа нагло влошување на расположението на инвеститорите.
„Меѓународните финансиски пазари се под силен притисок, а високото ниво на неизвесност се прелева на економските очекувања“, вели претседателот на ZEW, Ахим Вамбах.
Истражувањето на BofA покажа дека инвеститорите повторно се повеќе се плашат од рецесија и стагфлација.
Нешто повеќе од половина од анкетираните менаџери на глобално ниво очекуваат послаб раст на светската економија. Иако 84 отсто од нив предвидуваат слабеење на инфлацијата, 88 отсто сметаат дека во следните 12 месеци најверојатното макроекономско сценарио е стагфлација, односно анемичен раст и висока инфлација.
Меѓу менаџерите на европските фондови, 61 отсто очекуваат рецесија во Европа во следната година, додека 55 отсто очекуваат таков исход во февруари. 42 отсто од менаџерите очекуваат глобална рецесија, речиси двојно повеќе отколку во февруари.
