Во неделата челниците на земјите од групата Г7 ја потврдија својата поддршка за Украина против руската инвазија на самитот во Хирошима, во Јапонија, а на состанокот се приклучи и украинскиот претседател Володимир Зеленски, кој се сретна со американскиот претседател Џо Бајден.
Лидерите на Г7, групата која ги вклучува САД, Јапонија, Германија, Велика Британија, Франција, Италија и Канада, испратија јасна порака до Русија за нивната силна поддршка за Украина на самитот во Хирошима овој викенд.
На средбата со украинскиот претседател, Бајден најави испорака на ново оружје и муниција за Киев. Новата испорака ќе вклучува „муниција, артилерија, оклопни возила“, рече Бајден, кој пред неколку дена ја поддржа обуката на украинските пилоти да летаат со авиони „F-16“.
Иако германскиот канцелар Олаф Шолц не очекува, како што рече, наскоро да ѝ бидат испорачани модерни борбени авиони на Украина, тој нагласи дека планот за обука на пилоти ја покажува посветеноста на Западот кон Украина. Соединетите држави сè уште не одлучиле конечно „што ќе биде на крајот од обуката“, рече тој.
„Проектот првенствено е порака до оние кои ја нападнаа Украина: Русија не треба да се коцка дека нејзината поддршка за Украина ќе се намалува како што војната продолжува. Пораката останува: Русија мора да ги повлече своите сили“, посочи Шолц.
Канадскиот премиер Џастин Трудо на прес-конференција рече дека Канада ќе го поддржува Киев „сѐ додека е потребно“. „Исто така, ќе продолжи да ги обучува украинските војници, што го прави од 2015 година, а можеби и пилоти“, рече Трудо.
Британскиот премиер Риши Сунак изјави дека неговата земја ќе започне со обука на пилоти ова лето. Тој рече дека никој не сака мир повеќе од украинскиот претседател, но дека условите за мир мора да се засноваат на принципите на Киев.
Зеленски на Telegram напиша дека на самитот им го претставил мировниот план на лидерите на Г7.
„Го развивме мировниот форум на таков начин што гарантира дека секоја негова точка е поддржана со резолуции на ОН. За да може секој во светот да избере цел што може да помогне да се постигне. Од Јапонија до арапските земји, од Европа до Латинска Америка, наоѓаме поддршка за формулата за мир. И ја продолжуваме оваа работа“, напиша Зеленски.
Според неговото верување, светот има доволно сила да ја принуди Русија чекор по чекор да воспостави мир, а Украина му понуди формула за мир. Во својот говор на Г7, чиј текст беше објавен на претседателската веб-страница, тој рече: „Не обединува уште еден принцип – рационалноста“.
„Украинската формула за мир е очигледен израз на рационалност. Ви благодарам што ја поддржавте нашата формула.
Францускиот претседател Емануел Макрон изјави дека се надева оти присуството на украинскиот претседател на собирот на седумте водечки индустриски земји (Г7) во Јапонија ќе им помогне на земјите како Бразил и Индија подобро да ја разберат ситуацијата во Украина.
Коментирајќи го фактот дека авион на француската влада го донесе Зеленски на состанокот на Арапската лига во Саудиска Арабија пред да го донесе во Хирошима, Макрон рече дека станува збор за градење мир и барање решенија.
„Во интерес на Франција и нејзината улога како постојана членка на Советот за безбедност на ОН беше да му дозволи на Зеленски да зборува пред неколку светски сили кои понекогаш се изложени на само еден дискурс“, изјави Макрон за новинарите на маргините на самитот.
