Италија се збогува со поранешниот премиер Силвио Берлускони во средата со државниот погреб на кој се очекуваат илјадници луѓе, меѓу кои и врвни политичари од Апенинскиот полуостров и неколку странски претставници, а во земјата е прогласен и ден на жалост.
Официјалниот погреб на 86-годишниот милијардер, кој почина во понеделникот од леукемија, ќе започне во 15 часот во катедралата во Милано. Церемонијата треба да се емитува на големи екрани кои ќе бидат поставени на плоштадот и пред катедралата за да можат оние кои не можат да влезат да ја следат церемонијата.
Присутни ќе бидат претседателот Серџо Матарела, премиерката Џорџа Мелони и двајцата вицепремиери Матео Салвини и Антонио Тајани, кој е вториот човек во неговата партија Напред Италија.
Европската комисија ќе ја претставува нејзиниот економски комесар, Италијанецот Паоло Џентилони, поранешен италијански премиер. Унгарија ќе ја претставува премиерот Виктор Орбан.
Покрај државното испраќање, во средата во Италија беше прогласен и ден на жалост, што, сепак, не е по вкус на сите Италијанци.
„Планиран е државен погреб и тоа е во ред, но националната жалост за личност којашто предизвикува поделби како Силвио Берлускони ми се чини несоодветен избор“, рече за јавното радио Рози Бинди, поранешна (2006.-2008.- левичарска министерка во владата на Романо Проди.
Силвио Берлускони, милијардер чија кариерата беше проследена со скандали, доминираше во италијанската политика, бизнисот и фудбалот најмалку три децении. Покрај тоа што четири пати беше премиер на Италија, Берлускони поседуваше деловна империја вклучувајќи ја медиумската група MFE и фудбалските клубови АЦ Милан од 1986 до 2017 година и АЦ Монца од 2018 година.
