Во средбата меѓу последните две екипи коишто ја започнаа новата сезона во НБА лига, Милвоки Бакс ги совлада Филаделфија 76ерс со 118:117 во дербито на Источната конференција.
Бакс имаа 19 поени предност, но Сиксерс поведоа со 102:94 со серија од 14:0 на почетокот на четвртата четвртина. Сепак, следеше изедначена серија на домашните кои го вратија во водство, а во интересната завршница работите во свои раце ги презеде новиот играч на Милвоки, Демијан Лилард постигнувајќи ги последните 11 поени на својот тим.
Лилард погоди тешка „тројка“ за 116:111 на 11,13 секунди до крајот, а откако Тобијас Харис погоди „тројка“ за 116:114, Лилард отиде на положување при што судиите свиреа фаул, а тој ги погоди двете слободни фрлања за 118:114. Стрелец за три поена со звукот на сирената беше на Де’Ентони Мелтон no само за да ја намали предноста на 118:117.
Лилард ги предводеше Бакс со 39 поени, ги погоди сите 17 слободни фрлања и имаше осум скока. Јанис Адетокумо додаде 23 поени и 13 скока за домашниот тим, додека четворица играчи со 20 или повеќе поени не беа доволни за победа на Сиксерс – Тајрис Макси постигна 31, Кели Оубре 27, Џоел Ембиид 24, а Тобијас Харис 20.
Очекувано, Џејмс Харден отсуствуваше од тимот на Сиксерс поради „лични причини“, но НБА одлучи да отвори истрага за ова прашање бидејќи Харден летово јавно изјави дека повеќе нема да игра за Филаделфија поради конфликт со генералниот менаџер.
Лос Анџелес Лејкерс и Феникс Санс го одиграа вториот натпревар во новата сезона, а Лејкерси го искористија неиграњето на Девин Букер и Бредли Бил и славеа на својот паркет со 100:95. Клучна беше последната четвртина во која затаи нападот на гостите, па домашните го добија тој дел од играта со 28:11 за пресврт.
Ентони Дејвис ги предводеше Лејкерси со 30 погодоци и 12 скока, но клучните кошеви на крајот ги постигна Леброн Џејмс, кој застана на 21 кош, 8 скока и 9 асистенции. Кај Санс убедливо најдобар беше Кевин Дурент со 39 поени и 11 скока.
И Лејкерс и Санс сега имаат сооднос на победи и порази 1:1.
