Грчката централнодесничарска влада планира да поднесе нацрт-закон со кој се дозволуваат истополови бракови, и покрај долгогодишното противење од влијателната православна црква и пратениците во земјата. Во интервју за државната телевизија ЕРТ во средата, премиерот Киријакос Мицотакис објави: „Она што ќе го донесеме е еднаквост во бракот“. Тој не прецизираше временска рамка, но рече дека „нема да биде долго“.
„Ќе ја отстраниме секоја дискриминација во врска со сексуалната ориентација во однос на брачните односи“, рече Мицотакис, притоа појаснувајќи дека законот ќе дозволи посвојување деца, но, не и сурогат родителство за истополови парови.
„Идејата за жени кои се претвораат во машини за производство на деца по барање… тоа нема да се случи“, рече тој.
Предлог-законот се очекува да ја подели конзервативната партија на Мицотакис, Нова демократија, при што некои пратеници се противат на какви било такви промени. Мицотакис рече дека нема да ги „присили“ да го поддржат законодавството и дека ќе побара меѓупартиска поддршка. Ова прашање е приоритет за главната опозициска партија, Сириза, чиј лидер Стефанос Каселакис е отворено геј, и вели дека тој и неговиот партнер – со кој стапил во брак во Њујорк во октомври – сакаат да станат родители преку сурогат мајчинство.
Грција ги легализираше истополовите граѓански партнерства во 2015 година, обезбедувајќи им на таквите парови некои права и бенефиции, но во моментов не им е дозволено да посвојуваат деца. Дозволувањето на истополовите бракови беше клучното предизборно ветување на Мицотакис, кој беше реизбран минатата година. Од 2021 година, Мицотакис воведе голем број реформи, вклучително и укинување на забраната за хомосексуалните мажи да даруваат крв.
На реформите жестоко се спротивстави Грчката православна црква, која има значително влијание во општеството и политиката. Околу 80-90% од 11-те милиони луѓе во земјата се идентификуваат како православни Грци. Мицотакис рече дека според планот, истополовите венчавки нема да се спроведуваат во цркви, објаснувајќи: „Не барам работи од црквата што знам дека не може да ги направи“.
49 отсто од Грците се против легализирање на истополовите бракови, а 35 отсто се за, според анкетата на јавното мислење оваа недела од националниот анкетар Алко. Од јануари 2024 година, 20 европски земји легално ги признаваат и спроведуваат истополовите бракови.
