Германскиот канцелар Олаф Шолц денеска во Ватикан се сретна со папата Франциск на неговата прва приватна аудиенција со поглаварот на Католичката црква.
Двајцата лидери разговараа околу 30 минути во Апостолската палата. Темите беа војните во Украина и на Блискиот Исток, како и одговорот на миграцијата, рече Шолц.
Шолц по средбата рече дека тоа бил „важен разговор во време кога е клучно за нас да гледаме во иднината со јасен поглед и да имаме јасни принципи“.
– И за мене лично, важен, значаен разговор, додаде тој.
Двајцата си размениле и подароци. Шолц на папата му ја подари официјалната топка на фудбалскиот шампионат Еуро 2024, што ќе се одржи во Германија, како и порцеланска мечка со германскиот грб, јави ДПА.
Ова е прва подолга средба на канцеларот со 87-годишниот понтиф. Тие двајца претходно се сретнаа на почетокот на минатата година, на погребот на поранешниот папа Бенедикт Шеснаесетти, кој е роден во јужна Германија и таму помина голем дел од својата кариера како свештеник, теолог и надбискуп.
Шолц вчера пристигна во дводневна посета на Рим и се сретна со италијанскиот претседател Серџо Матарела. Канцеларот нема да се сретне со италијанската премиерка Џорџа Мелони, која моментално е во посета на САД.
Шолц попладнево треба да присуствува на конгресот на Партијата на европските социјалисти (ПЕС) во Рим, каде што треба да биде избран водечкиот кандидат на групата за претстојните избори за Европскиот парламент во јуни.
Единствениот кандидат е европскиот комесар за работни места Николас Шмит, од Луксембург.
