Бангладешката премиерка Шеик Хасина поднесе оставка во понеделникот и побегна од земјата, велат повеќе извори, додека сѐ повеќе луѓе гинат во едно од најтешките насилства од основањето на јужноазиската нација пред повеќе од пет децении.
Началникот на армијата, генералот Вакер-Ус-Заман, во телевизиско обраќање изјави дека 76-годишната Хасина ја напуштила земјата и дека ќе се формира привремена влада.
Медиумите објавија дека таа ја напуштила земјата со воен хеликоптер со нејзината сестра и се упатила кон источната индиска сојузна држава Западен Бенгал веднаш преку границата. Во друг извештај се вели дека таа се упатила кон североисточната индиска држава Трипура.
Засега агенциите не можат да добијат потврда на овие информации. Во меѓувреме, американската телевизиска мрежа CNN јави дека Хасина пристигнала во североисточниот индиски град Агартала.
На телевизиските снимки се гледа како илјадници луѓе се слеваат на улиците на главниот град Дака, славејќи и извикувајќи слогани. Илјадници луѓе упаднаа и во официјалната резиденција на Хасина „Ганабабан“, извикувајќи слогани, удирајќи со тупаници и покажувајќи го симболот на победа.
Телевизиските снимки покажуваат и толпи луѓе во резиденцијата, како и луѓе кои носат телевизори, столици и маси од една од најзаштитените згради во земјата. „Побегна од земјата, побегна од земјата“, извикуваа некои.
Демонстрантите во Дака, исто така, се качија на големата статуа на водачот на независноста, шеикот Муџибур Рахман, таткото на Хасина, и почнаа да ја сечат главата на статуата со секира, покажаа сликите.
Студентски активисти повикаа на марш до главниот град Дака во понеделникот, пркосејќи на националниот полициски час за да ја притиснат Хасина да поднесе оставка, еден ден по смртоносните судири низ целата земја во кои загинаа речиси 100 луѓе. Во протестите минатиот месец беа убиени околу 150 луѓе.
Според проценките на агенцијата AFP, врз основа на податоците на полицијата, официјални лица и болнички извори, најмалку 300 луѓе се убиени од почетокот на протестите во јули.
Во понеделникот најмалку шест лица загинаа во судири меѓу полицијата и демонстрантите, објави весникот Daily Star. Агенцијата Reuters објави дека не можеле веднаш да го потврдат извештајот.
Бангладеш е зафатен од протести и насилство што започнаа минатиот месец откако студентските групи побараа крај на контроверзниот систем на квоти за владини работни места. Тоа прерасна во кампања за притисок врз Хасина, која го освои четвртиот последователен мандат во јануари на изборите бојкотирани од опозицијата, да се повлече.
