Инспекциските служби на Агенцијата за храна и ветеринарство (АХВ) спроведоа вонреден инспекциски надзор кај операторот со храна Атлантик траде ДОО Скопје, увозник на производите од компанијата „Ферер“. Контролата се спроведе врз основа на добиеното известување од „Фереро“- Загреб, Република Хрватска, со кое се информира дека од превентивни причини од пазарот во Македонија се повлекуваат неколку серии од Киндер производите, соопштија од АХВ.
Согласно известувањето од Хрватска, од пазарот во земјава се повлекуваат сериите производи чиј рок на употреба истекува на 03.10.2022, 23.08.2022,02.06.2022, 07.07.2022, 15.07.2022, 11.06.2022,11.06.2022 и 30.06.2022 година.
Попладнево АХВ доби и нотификацијата од Системот за брзо предупредување за храна и храна за исхрана на животни (РАССФ) на Европската унија, со која се алармира дека на пазарот во земјава е пласиран сомнителен чоколаден производ од овој производител.
Врз основа на извршената инспекциска контрола, на компанијата увозник издадено и е решение со кое се забранува промет на призводи Киндер со лот L006LtB-NR, L330RtB-MJ, L2923RtDKX, L328RtD-M,L336RZD-MU, L302RO3, L321RO3. На операторот му е издадена и наредба да изврши отповикување на наведените лотовиод производот и повлекување на количините кои се пласирани на пазарот.
Потврда за итно, превентивно повлекување од пазарот на производи од овој бренд до АХВ прати и компанијата увозник која извести дека од пазарот се повлекува производoт 260320 Kinder Schokobons G125x16, серија L321R03, со рок на траење 30.06.2022 година, серија L302R03, со рок на траење 11.06.2022 година, од производителот Ferrero Ardennes S.A., rue Pietro Ferrero 5, 6700 Арлон, Белгија.
АХВ ги известува потрошувачите кои го имаат купено овој вид на производ, истиот да не го консумираат, да го вратат на местото од каде го купиле.
Минатата недела британските медиуми објавија дека се повлечени од продажба во повеќе европски земји киндер чоколадните јајца, поради откриено присуство на салмонела, по што произведувачот „Фереро“ упати апел за стопирање на продажбата.
