Музејот на ВМРО набрзо ќе биде дел од анализата на работната група која врши ревизија на проектот „Скопје 2014“, најави министерот за култура Роберт Алаѓозовски, кој заедно со премиерот Зоран Заев во неделата го посети скопскиот Аквадукт.
Прашан во врска со ревизијата на проектот „Скопје 2014“, министерот Алаѓозовски рече дека работната група која врши ревизија на проектот не прави сеопфатна анализа, туку оди дел по дел.
„Во таа смисла тие од една страна анализираат конкретни споменици, а од друга страна анализираат и институци. Музејот на ВМРО ќе биде набрзо дел на нивната опсежна анализа, а секако ќе се осврнат и на илјадата мали сувенири и статуетки од проектот Скопје 2014. Така што дел по дел адресираат различни аспекти. Нивните елаборати потоа ги преземаме во Министерството за култура, а заедно со интерресорската група од општина Центар и Градот Скопје разговараме како понатаму да се постапува. Доколку има потреба и Градот и Министерството и општината Центар преземаат продолжителни анализи со цел евентуалното отстранување да биде изведено согласно сите законски процедури“, рече Алаѓозовски.
Ги отфрли тврдењата од Софија дека отстранувањето на споменикот на Ќосето е направено согласно договорот со Бугарија.
