Водечкиот тим во англиското фудбалско првенство Арсенал ја зголеми својата предност пред второпласираниот бранител на титулата Манчестер Сити на осум бодови, откако со 2:0 како гостин победи во дербито од најголемиот градски ривал Тотенхем во 19-то коло на Премиер лигата.
Арсенал поведе во 14 минута по несфатливата грешка на противничкиот голман Иго Љорис. Сака од „мртов агол“ упати силен удар кој ќе минеше паралелно со гол-линијата, но Љорис се реши да ја фати топката која го погоди во градите и се одби во мрежата, така што погодокот е впишат официјално како него автогол. Конечниот резултат го постави капитенот на „Топчиите“, Мартин Одегард, со прецизен низок удар од 20-ина метри.
Арсенал сега има 47 бодови, осум повеќе од вториот Манчестер Сити, а девет повеќе од третиот Њукасл Јунајтед и четвртиот Манчестер Јунајтед, притоа клубовите од Манчестер имаат и по натпревар помалку. Тотенхем со 33 бодови од 19 кола остана на петтата позиција.
Претходно во неделата Њукасл Јунајтед минимално со погодокот во самиот финиш на дуелот, во 89 минута преку Александер Ајсак, на домашен терен го совлада Фулам. Дваесетина минути претходно Фулам имаше голема можност да поведе, бидејќи беше покажан пенал по прекршокот на Трипие врз Декордова-Рејди. Но српскиот напаѓач Александар Митровиќ при изведувањето на најстрогата казна се лизна, ја удри топката десната нога со која се погоди во левата, а иако топката заврши во мрежата судијата го поништи погодокот поради неправилно изведување. Ова беше веќе третиот нереализиран пенал на Митровиќ во Премиер лигата сезонава, со што уште сега на половината од првенството го израмни негативниот рекорд во оваа категорија кој во сезоната 2018/2019 го поставија Пол Погба и Гилфи Сигурдсон.
Третиот Њукасл сега на третото место има 38 бодови од 19 натпревари, а Фулам остана моментално шести со 31 бод но има одиграно 20 натпревари.
Челзи, исто така, минимално со 1:0 со голот на Каи Хаверц во 65 минута го победи на домашен терен Кристал Палас. Десеттиот Челзи сега бодовно се израмни со деветтиот Ливерпул, двата клуба имаат по 28 бодови, но лондонскиот има меч повеќе. Кристал Палас е 12-ти со 22 бодови.
