Австрија го укина ветото за пристапување на Романија и на Бугарија кон безграничниот простор Шенген, кон кој овие две земји со години се обидуваат да влезат. Овој пробив беше соопштен попладнево на состанокот во Будимпешта во организација на унгарското претседателство со Советот на ЕУ, на кој учествуваа министрите за внатрешни работи на Романија, Бугарија и Австрија.
Тројцата министри потпишаа заеднички договор кој ќе го отвори патот за полноправно членство во Шенген, изјави унгарскиот портпарол. Во пракса тоа значи укинување на контролите на копнените граници, што е последната пречка која преостана. На почетокот на оваа година беа укинати контролите на морските и воздушните граници како прва отстапка на Виена.
Бугарија и Романија би можеле да станат полноправни членки на Шенген зоната во јануари 2025 година, соопшти во петокот Унгарија, додавајќи дека конечната одлука ќе биде донесена на состанокот на министрите за внатрешни работи на ЕУ следниот месец.
Бугарија и Романија, членки на ЕУ и НАТО, делумно влегоа во Шенген зоната во март, по договорот со Австрија, која првично се спротивстави на тоа, велејќи дека треба да направи повеќе за да ја спречи илегалната имиграција.
Тогаш беа укинати граничните контроли во воздушниот и поморскиот сообраќај, а преговорите со Австрија продолжија.
„Двете земји презедоа значајни чекори за да добијат полноправно членство“, рече унгарскиот министер за внатрешни работи Шандор Пинтер на прес-конференција по разговорите со неговите романски, бугарски и австриски колеги.
„Ние сме чекор поблиску Бугарија и Романија да станат полноправни членки на Шенген“, рече Пинтер.
Пинтер рече дека на состанокот на министрите за внатрешни работи на ЕУ на 11 декември ќе биде претставен пакет мерки за безбедност, вклучувајќи аранжмани за најмалку 100 граничари на границата меѓу Турција и Бугарија.
Романскиот премиер Марсел Чолаку во понеделникот рече дека двете земји ќе се приклучат на Шенген зоната следната година и рече дека состанокот во Будимпешта, каде што ќе биде договорен финалниот документ, е „клучен“.
Додаде дека холандскиот парламент, кој се противи на пристапувањето на Бугарија, исто така ќе мора да го одобри документот.
Романија и Бугарија се на важни рути за нелегална трговија со оружје, дрога и луѓе, но Европската комисија соопшти дека по детална истрага утврдила дека ги исполнуваат сите услови за членство во Шенген.
Романија оцени дека противењето на Австрија е неоправдано, а како доказ ги наведе податоците на Фронтекс, според кои илегалните имигранти влегле во ЕУ најмногу од Западен Балкан, а не од Романија.
