Бројот на бегалци кои пристигнуваат во Берлин се приближува до рекордното ниво забележано во 2015 година за време на сириската бегалска криза, а во иднина може да се очекува уште поголем број, изјави денеска градоначалничката на Берлин, Франциска Гифи.
– Во моментов, само во Берлин секојдневно пристигнуваат околу 150 Украинци и 150 баратели на азил од други земји. Ова е речиси исто ниво како во 2015 година. Очекуваме оваа бројка да се зголеми во наредните месеци, рече Гифи.
Таа верува дека повеќе Украинци ќе ја напуштат својата земја ако се соочат со прекини на струја, прекини на вода и недостиг на греење.
На 24 февруари Русија ја започна својата агресија во Украина. Голем број бегалци од Украина заминаа во европските земји со барање за азил.
Според податоците на ОН, до 1 ноември во Европа се регистрирани над 7,8 милиони бегалци од Украина, а во Германија повеќе од еден милион. Во Русија се регистрирани уште четири милиони, објави руското Министерство за надворешни работи во септември.
