Биткоинот ја надмина вредноста од 20 000 американски долари за прв пат во историјата.
Најголемата криптовалута во светот порасна денес за седум проценти, а попладнево вредела 20 787 американски долари, пренесува Блумберг.
Оваа година, биткоинот е скоро тројно зголемен.
Биткоинот на тој начин го поздравува крајот на годината со најголема вредност досега. Но, на почетокот на годината не изгледаше така.
Од средината на февруари до средината на март, неговата цена падна за повеќе од 50 проценти – на само 4.895 американски долари. По кратка фаза на опоравување, цените долго време се движеа близу границата од 10.000 долари – до пред неколку недели.
Во ноември, биткоинот се држеше на околу 16 000 американски долари.
На крајот на 2017 година, Биткоин скоро ја допре вредноста од 20 000 американски долари , но потоа следуваше пад.
