Српската премиерка Ана Брнабиќ оцени дека по апсењето на криминална група од Врачарци од Белград, опасноста по животот на српскиот претседател Александар Вучиќ не поминала бидејќи, како што рече, „мозоците сѐ уште се на слобода“
„Ја исполнивме нашата главна цел затоа што го одбранивме животот на претседателот Александар Вучиќ и неговото семејство, а не верувам дека Радоје Звицер и Никола Вушовиќ се сами, бидејќи кој знае кој се уште е таму“, изјави во неделата Брнабиќ на ТВ Прва.
Посочи дека властите имале сознанија за планирањето на убиствата и дека претходно и самата зборувала за тоа и додаде дека медиуми и група аналитичари кои ја исмевале, биле платени од српски тајкуни.
„Тоа дополнително отвори простор за такво нешто да се интензивира и дополнително беше неодговорно. Дали сега можеме да слушнеме барем едно извинување, да покажеме дека се одговорни за тоа што го кажале“, рече Брнабиќ.
Им се заблагодари на припадниците на српските безбедносни служби, бидејќи успешно го заштитиле претседателот и неговото семејство.
„За жал, морам да кажам дека опасноста по животот на претседателот не помина. Сторителите се на слобода и надвор од дофатот на службите“, рече Брнабиќ.
Оцени дека оној кој сака да ја дестабилизира Србија и да ја врати во минатото, „најлесната опција за ова е да работи за главата на Вучиќ“.
„Срамота е кога некој ќе праша зошто не направивме ништо, а имавме информации – па така и направивме. Го спасивме животот на Вучиќ и неговото семејство. Тоа е континуирана борба“, заклучи српската премиерка.
