Претставници на бугарските клубови во Охрид, Битола и Прилеп од Северна Македонија биле сослушани во бугарската Собраниска Комисија за политики за Бугарите надвор од Бугарија, објави БНТ.
Како што јави дописникот на МИА од Софија, тие се пожалиле на систематско кршење на правото на слободно изразување и етничко самоопределување на бугарските граѓани во Република Северна Македонија и побарале сериозно следење и поактивна помош од Бугарија и нејзините европратеници во Брисел.
Претседателот на Парламентарната комисија во 48. Народно собрание Костадин Костадинов од „Преродба” ги запознал со текстот на писмото што го подготви до вршителот на должност премиер на Бугарија Галаб Донев со детално објаснување за проблемите на Бугарите во Северна Македонија и со инсистирање на средба. Заменик-претседателот на Комисијата Елисавета Белобрадова од „Демократска Бугарија” изјавила дека ќе се подготви детален извештај на оваа тема и ќе биде доставен до Европската Унија.
