Четири автомобили биле оштетени од заскитани куршуми вчера во Полошко, информираше МВР.
Според полицијата, два инциденти се случиле во Тетово, а по еден во Желино и Чегране.
Околу 13.45 часот било пријавено дека во Тетово на улицата Браќа Миладинови од заталкан куршум бил оштетен кровот од автомобил „БМВ“ со швајцарски национални ознаки, сопственост на Ф.А.(44) од Тетово.
Три часа подоцна Р.А.(21) од Боговиње пријавил дека на улицата Илинденска од заталкан куршум била оштетена хаубата од неговиот автомобил „рено меган“.
Во 13.30 часот било пријавено дека во Желино во дворот од куќа сопственост на М.А.(41) од заталкан куршум било оштетено задно ветробранско стакло од автомобил „мерцедес“ со белгиски национални ознаки.
Гостиварецот С.Н.(41), пак, околу 17 часот пријавил дека во село Чегране во двор од куќа од заскитан куршум било оштетено предно ветробранско стакло од неговиот автомобил „опел астра“.
Полицијата работи на целосно расчистување на настанот.
