Врз основа на ефективниот репродукционен број може да се прават сите останати прогнози на темпото на зголемување на дневните бројки, денот на достигнување на врвот, како и темпото на намалување на бројките. Преносливоста мометално е под еден, односно секој заразен во просек заразува помалку од еден односно 0,99%, што претставува забавување на растот на дневните бројки, изјави во „Утрински брифинг“ Дејан Трајковски, професор на УКЛО.
-Пикот, односно врвот на заразувањето бил достигнат околу 31 март, што тогаш не можеше да се види, мораше да помине извесно време. Максимална дневна бројка на новодијагностицирани имавме на 30-ти март со 1.502 нови случаи. Оттогаш се забележува извесно плато, стагнација на растот, а деновиве треба да забележиме секојдневно поголемо намалување, вели професорот Трајковски.
Кога јас би се прашувал, додава професорот. овие мерки требаше да бидат донесени уште пред два месеци, односно со доаѓањето на британскиот сој на вирусот во Македонија.
-Мерките се презадоцнети, иако никогаш не се излишни. Доколку мерките беа донесени пред два месеци, дневните бројки немаше да се искачуваат толку високо и стрмно. Ќе имавме понизок, но поразлеан тип, бран, на повеќе месеци. Тоа е подобро заради капацитетите на болниците, но никогаш немаше да се доведеме до ваква ситуација – трка со времето. Се разбира никогаш не е доцна воведување на дополнителни мерки. Воведување на локдаун за Велигден би било како една превенција да се спречи групирањето на луѓето и одновно разгорување на епидемијата. Но не знаеме како ќе се одлучат нашите здравствени власти, вели Трајковски.
Последните мерки, додава тој, беа донесени практично два дена после врвот на заразувањето, што не е од некаква корист.
-Здравствените власти очигледно се раководат само со бројот на хоспитализирани. Упорно како да се форсираше што побрзо заразување и поминување на врвот, а како што видовме тоа дојде до претрупување на болниците, смета Трајковски.
