-Европскиот пат значи многу поголем квалитет и многу поискрен пристап. Ако Ковачевски речиси цели два месеци се пазареше и мака мачеше за да стигне до денешнава седница, чиј старт самиот го прогласи за ден на жалост, што исто така беше пресметано за да има џокер во рака, тогаш најмалку може да се заклучи дека оваа коалиција е за европска агенда, вели пратеничката од ВМРО-ДПМНЕ, Дафина Стојаноска од денешната собраниска седница на која се дискутира за именување на новите предлози за министри.
Таа посочи дека ова е се само не коалиција за реализирање на европската агенда, зошто ако беше така, Ковачевски немаше да бара разрешување на министрите за здравство, информатичко општество и за дијаспора, туку ќе предложеше разрешување на министерот за надворешни работи, Бујар Османи и вицепремиерот за европски прашања, Бојан Маричиќ.
„Да беше така, немаше Ковачевски да ги разрешува министрите за здравство, информатика и дијаспора и да договара оставки од Тупанчевски и Нухиу. Да се работеше за европска агенда, Ковачевски прво ќе ни понудеше разрешувања на Османи и на Маричиќ. Едниот отиде во Бугарија, затапувајќи не знам чии интереси и засенувајќи ја улогата на институциите кои што меѓу останатото и заради оваа имаат веќе доверба под 4%, а другиот јадејќи бифтеци, трошејќи народни пари уште не знае со сигурност дали преговорите за членство во ЕУ се започнати или се започнати пред пристапни преговори или е во тек само скрининг, не знам кој по ред“, рече Стојаноска.
Според неа, вакви несериозни ликови, не може да ја водат европската агенда, како што не може во Европа да не водат премиер и претседател на држава кои се плашат да дадат една државничка изјава, истата ја менуваат за кусо време и внимаваат да не ги навредат сите освен Македонците од Македонија и надвор од Македoнија.
