Денес на одбележувањето на Светскиот ден на грижа за ментално здравје, 10 октомври потсетуваме на важноста на менталното здравје за целата популација. Во услови на Ковид-19 важно е да се обрне внимание на влијанието на кризата врз менталното здравје на групите под ризик, како што се повозрасни лица, децата и адолесцентите, различни групи со зголемен ризик за насилство, лицата кои веќе се лекуваат од ментални растројства, како и на здравствените работници, кои несебично ги вложуваат сите свои човечки потенцијали за справување со пандемијата и за зачувување и подобрување на здравствениот статус на населението.
Грижата за нашето ментално здравје е исто толку важна како и грижата за физичкото здравје.
Во поддршка на овој важен сегмент на колективното здравје, Клиниката за психијатрија е активно вклучена во справувањето во борбата со коронавирусот и токму во насока на унапредување на менталното здравје. Клиниката има отворено повеќе телефонски линии за различни целни групи и почнувајќи од март оваа година досега се реализирани над 4500 телефонски разговори за психолошка поддршка на граѓаните за време на пандемијата со Ковид 19.
Од Клиниката информираат дека во тек е меѓународно истражување за менталното здравје на населението за време на мерките за контрола на пандемија со овој вирус. Координатор на истражувањето е италијанското здружение за социјална психијатрија, а координатор за нашата држава е токму Универзитетската клиника за психијатрија. Оваа студија се спроведува со цел да се изврши процена на влијанието на пандемијата Ковид-19, како и воведените рестриктивни мерки врз менталното здравје кај нашето население како основа за развој на соодветни здравствени интервенции.
„Во изминатиот период покажавме вистинска грижа и беа реализирани бројни активности за унапредување на условите за третман за пациентите во установите кои ја третираат оваа категорија пациенти. Универзитетската клиника за психијатрија е учесник во два интернационални проекти за ментално здравје во заедницата во рамки на програмата Horison 2020 на Европската Комисија – ИМПУЛС кој е раководен од Queen Mary University од Лондон и RECOVERY кој е раководен од Trimbos Institute од Утрехт. Во овој период на пандемија со Ковид, имаме опсежна и успешна соработка со УНИЦЕФ, како и координираност со СЗО.“ – изјавуваат од Клиниката за психијатрија.
Направени се значајни инвестиции во унапредување на условите за пациентите во болницата, како и осовременување на опремата и терапиите. При што, обновен е апаратот за транс-кранијална магнетна стимулација, набавен е тест за дијагностика на состојбата на вниманието и хиперактивност кај деца и возрасни. Воведени се и дијагностички процедури таргетирани за деменции. Отворени се неколку нови кабинети – за снимање на состојбата при спиење, за ментално здравје на жени во перинатален период, кабинет за деменција.
Исто така, комплетно се реновирани и опремени болничките соби за третман на хоспитализирани пациенти. Инсталирана е дигитализација на објектот, како и климатизација на сите простории. Целосно е реновиран и амбулантскиот дел и кровот на зградата.
Во Психијатриската болница Демир Хисар е комплетно изграден нов машки павилјон за чија изградба средствата ги обезбеди Американската амбасада. Уредувањето го финансираше самата болница. Павилјонот е со површина од 510м2, каде се сместени болнички дел со 36 болнички кревети, санитарен и административен дел. Инаку, ова е прва посериозна интервенција на капацитетите од основањето на институцијата пред 63 години.
Значително се унапредении условите и во Психијатриската болница-Негорци во Гевгелија каде е отворено ново одделение за акутни состојби во психијатријата. Новото одделение е изградено од темел, на место на постојното одделение. Изградено е од цврста градба, со површина од 560 m2 и е енергетски ефикасно со термоизолациска фасада, квалитетна столарија, соларен систем и панелен кров со највисок изолациски коефициент. Исто така, во изминатиот период е извршена уште една комплетна внатрешна реконструкција на хроничното одделение со површина од 450 m2, при што се поставени нови подови и плочки, целосно нови купатила и тоалети и извршено е реновирање на целата површина на ѕидови и тавани, при што е поставена целосно нова столарија и соларен систем за целото одделение.
Токму на овој ден уште еднаш потсетуваме за важноста од грижата на нашето ментално здравје, посебно во време на светска пандемија со Ковид-19 и апелираме граѓаните да побараат стручна помош, психијатар или психолог доколку стресот е присутен во текот на дневните активности подолг период и не успеат да најдат начин како да се справат со него.
