Лидерот на босанските Срби Милорад Додик во четвртокот собра неколку илјади свои приврзаници во центарот на Бања Лука за да ги повика да не ја почитуваат резолуцијата со која ОН би можеле да го осудат геноцидот во Сребреница, а тој повторно се закани со одвојување на Република Српска од БиХ. т.е. создавање на голема Србија.
Додик организираше „народен собир“ на централниот градски плоштад во Бањо Лука, со образложение дека на овој начин сакал да испрати одговор од Република Српска на најавата дека во Обединетите нации треба да се усвои резолуција со која се осудува геноцидот извршен врз Бошњаците во Сребреница во 1995 година од страна на припадниците на војската и полицијата на босанските Срби.
Неговиот повик беше бојкотиран од опозициските партии, означувајќи го како политичка манипулација, а средбата како принуден собир на оние кои земаат плати од буџетот на ентитетот, но тоа не го спречи Додик пред насобраната толпа да тврди дека сега сите се обединиле. околу него.
Додик го нарече масакрот на осумте илјади Бошњаци, како што тврди меѓународната заедница а бројка којашто за српската страна е неколкукратно помала, во Сребреница во 1995 година „грешка“ и „тешко злосторство“, но тој инсистираше на тоа дека тоа не е геноцид. Рече и дека „одвратниот западен свет“ на чело со Германија учествува во заговор чија цел е да им наметне колективна вина на Србите и сѐ што е во полза на Бошњаците, па затоа Србите не сакаат повеќе да живеат со нив.
„Да има правада, ние ќе бевме во составот на Србија и немаше да има ова ср… кое што се вика Босна и Херцеговина. И така ќе биде“, се закани Додик, додавајќи дека верува оти ќе се создадат услови за тоа доколку Доналд Трамп победи на изборите за претседател на САД.
Овојпат, сепак, некои од неговите сојузници го надминаа Додик во неговите бизарни пораки. Така, Дарко Бањац, пратеник во парламентот на Република Српска и лидер на една од политичките партии во сојуз со Додик, во запаливо обраќање од говорницата, извика дека жали што „руската специјална воена операција не се прошири на другите нацисти“ во која ја вклучи Германија бидејќи е предлагач на резолуцијата за геноцидот во Сребреница
Додаде дека не сака да влезе во „геј Европската унија“, а тоа го кажа додека зад него стоеше Ана Брнабиќ, претседателката на српскиот парламент, која отворено се декларира како хомосексуалка.
Брнабиќ сепак им се придружи на говорниците и рече дека за неа секогаш е големо задоволство што доаѓа во Република Српска и дека Србија секогаш е за почитување на Дејтонскиот договор, но во тоа се чувствува сама и истовремено е цел на постојана напаѓа затоа што „секогаш за се се виновни Србите“.
Нејзината теза е дека резолуцијата на ОН за Сребреница значи ширење омраза кон Србите, па затоа Србија се бори против усвојувањето на таков документ.
„Србија отворено ќе се бори против тоа“, рече Брнабиќ, објаснувајќи дека Александар Вучиќ деновиве ги повикува шефовите на држави ширум светот за да ги убеди да не ја поддржат резолуцијата. Таа е сигурна дека резолуцијата нема да добие „експлицитно мнозинство“ во Генералното собрание на ОН.
