Претседателката на работната група за подготвување на предлог-иницијатива за потребата од уставни измени и поранешна судијка Маргарита Цаца Николовска, по завршувањето на денешниот состанок на групата, изјави дека расправата по деловникот завршила и оти истиот ќе се гласа идниот петок.
– Го разгледувавме деловникот. Завршивме со негово разгледување и во петок ќе го гласаме истиот. Тоа беше содржината на денешната седница – рече Цаца Николовска по завршување на состанокот.
Во однос на изјавите од Влада дека до крајот на мај очекуваат да биде познат текстот на уставните амандмани, таа повтори дека не би шпекулирала со време.
– Комисијата е составена од 23 членови, секој ќе сака нешто да каже, има право нормално. Сето тоа треба да се разгледува, да се сумира и во зависност од сето тоа ќе оди драфтирање на предлог нацрт амандманите – изјави Цаца Николовска.
На новинарското прашање околу Преамбулата и нормативниот дел од Уставот таа одговори дека сите членови од групата имаат мандат којшто е резултат на се она што се случуваше во Собранието и Владата, преку заклучоци, како и обврската за формирање на работната група.
Таа, исто така, информираше дека во Уставот стојат точни и конкретни насоки за изменување на истото и образложување на причините за пристапување кон измена на Уставот, и дека сите ќе се држат на тоа.
– Она што можам да кажам е дека апсолутно ќе се следат одредбите од Уставот и апсолутно ќе се постапува согласно Уставот. Ќе се интервенира таму каде што е потребно. И оние шпекулации дека не може да се интервенира во Преамбула или во некои одредени членови мислам дека наскоро ќе ги разјасниме и она што е најважно ќе дадеме аргументи за сите наши одлуки – истакна претседателката на работната група за подготвување на предлог-иницијатива за потребата од уставни измени.
Во однос на прашањето дали во Преамбулата или во нормативниот дел ќе се пристапи кон предлог за изменување на Уставот, таа одговори дека тоа ќе биде и во едното и во другото.
Работната група за подготовка на предлог-иницијативата за потребата од уставни измени, за внесување на Бугарите, заедно со другите етнички заедници, што, пак, е услов за отворање на кластерите во процесот на преговори со Европската Унија, ја сочинуваат 23 членови од кои десет се од редот на експертите, десет се предлози на политички партии и тројца се членови од институции.
