Европскиот парламент, ЕП, изгласа резолуција со која бара меѓународна истрага за наводните нерегуларности за време на изборите одржани минатиот декември во Србија, како и суспендирање на европските фондови, ако се докаже дека властите биле директно вмешани во измама на гласачите.
За резолуцијата на Европскиот парламент за ситуацијата во Србија по изборите гласаа 461 пратеник; против имаше 53, а воздржани 43.
ЕП бара независна истрага од почитувани меѓународни правни експерти и институции за нерегуларности на парламентарните, покраинските и локалните избори, со посебен осврт на изборите за собранието на град Белград, бидејќи одредени обвинувања се прошируваат, вклучително и оние за организирана миграција на гласачите на локално ниво надвор од опсегот вклучени во извештаите на ОБСЕ/ОДИХР (Канцеларијата на ОБСЕ за демократски институции и човекови права)“, се вели во едногласната резолуција, пренесува РСЕ.
ЕП ја повика Европската комисија детално да ги следи извештаите на Судот на ревизори и веднаш да започне со ревизија на средствата обезбедени за Владата на Србија во рамките на Инструментот за претпристапна помош III (ИПА III) и други финансиски инструменти. Доколку српските власти не се подготвени да ги спроведат клучните изборни препораки или ако наодите од оваа истрага покажуваат дека биле директно вмешани во измама на гласачите, ќе има суспензија на финансирањето на ЕУ врз основа на сериозни прекршувања на правилата, предупреди ЕП.
Се проценува дека парламентарните и локалните избори во Србија на 17 декември „отстапија од меѓународните стандарди и посветеноста на Србија за слободни и фер избори поради постојаната и систематска злоупотреба на институциите и медиумите од страна на функционерите со цел стекнување на неправедна и неоправдана предност. Овие избори не може да се смета дека се одржале под фер услови поради наводите за „широка и систематска измама што го загрози интегритетот на изборите во Србија“.
Во текстот со сериозна загриженост се забележуваат бројните докази собрани од меѓународни и домашни набљудувачи, кои покажуваат активности кои претходеле и во текот на денот на изборите, кои можеле да го променат исходот на изборите и се наведува дека би можеле да имаат критично влијание, особено врз изборните резултати за Белград.
„Србија, како земја кандидат за членство во ЕУ, нема доволно применети основни демократски стандарди на ЕУ и меѓународните стандарди. Се повикуваат властите на Србија да обезбедат доволно демократски гаранции за одржување на следните редовни локални избори во 2024 година, како и во иднина“, се нагласува во резолуцијата на ЕП.
Европските пратеници со резолуцијата најостро ги осудуваат неоснованите тврдења на српските власти дека во организацијата на постизборните протести биле вмешани земјите членки на Европската унија. Тие жалат што протестите биле искористени како повод за ширење анти-ЕУ наративи во медиумите блиски до владејачката партија.
Инаку, резолуциите на Европскиот парламент не се правно или политички обврзувачки за земјите-членки и европските институции.
