На европските берзи во средата претпладнето се тргува внимателно, исто како и претходниот трговски ден, додека инвеститорите чекаат нови вести коишто би можеле да ги насочат пазарите.
Индексот STOXX 600 на водечките европски акции беше во минус од 0,1 отсто во првиот дневен пресек, слабеејќи втор ден по ред. Истовремено, лондонскиот FTSE индекс ослабна за 0,19 отсто, на 7.667 поени, а париски CAC за 0,02 отсто, на 7.425 поени. Франкфуртски DAX зајакна, пак, за 0,06 отсто, на 16.698 поени.
И на повеќето азиски берзи цените на акциите паднаа. Индексот на азиско-пацифичките акции на MSCI, без јапонските, беше намален за 0,5 отсто во истиот дневен пресек како и во Европа, лизгајќи се близу до најниското ниво во еден месец.
Во исто време, на токиската берза индексот Nikkei скокна за повеќе од 2 отсто и се проби над нивото од 34.000 поени, првпат по 34 години. Но, цените на акциите во Шангај, Јужна Кореја, Хонгконг и Австралија паднаа меѓу 0,4 и 0,7 отсто.
Силниот раст на јапонскиот индекс Nikkei, меѓу другото, се должи и на растот на цените на акциите на големите извозници, бидејќи нивните производи поевтинуваат на странските пазари поради слабоста на јенот.
И додека Nikkei достигна највисоки нивоа во последните 34 години, некои кинески берзански индекси се движат близу петгодишните најниски нивоа. Тоа е последица на побавното од очекуваното закрепнување на кинеската економија од корона кризата.
Расположението не е ништо подобро и на останатите берзи во регионот, па индексите го следат вчерашниот пад на Волстрит, каде Dow Jones ослабе за 0,4, а S&P 500 за 0,15 отсто. Индексот Nasdaq зајакна, од друга страна, за 0,1 отсто.
По силните добивки во понеделникот, Dow Jones и S&P 500 вчера благо паднаа бидејќи инвеститорите беа претпазливи пред извештајот кој ќе покаже како се одвивала американската инфлација во декември.
Извештајот за потрошувачките цени ќе биде објавен во четврток, а за цените на производителите во петок. Овие извештаи би можеле да имаат значително влијание врз очекувањата за каматните стапки од американската централна банка.
До неодамна инвеститорите се надеваа на агресивно намалување на каматните стапки од страна на ФЕД, почнувајќи од март, но по објавувањето на записникот од минатогодишниот состанок на Fed, таквите шпекулации стивнаа. Пазарот на пари сега проценува дека има 65 отсто шанси Fed да ги намали каматните стапки за 0,25 процентни поени во март, во споредба со речиси 80 отсто пред една седмица.
