26 C
Skopje
сабота, август 8, 2020

ФИФА им обезбеди милијарда и пол долари помош на националните сојузи

29

Меѓународната фудбалска федерација (ФИФА) обезбеди 1,5 милијарди долари помош, донации и заеми на секој од 211 членки, како и на остатокот од фудбалската заедница погодена од пандемијата на коронавирус.

„ФИФА едногласно го одобри планот за помош од 1,5 милијарди американски долари“, рече претседателот на ФИФА, Џани Инфантино по виртуелниот состанок на советот на фудбалската организација.

„Сепак, ФИФА ќе спроведе строга контрола врз користењето на средствата“, додаде тој.

Секоја од 211 членки, вклучително и Македонската фудбалска федерација (ФФМ), може да добие донации од милион долари и дополнителни 500.000 долари исклучиво за да му помогне на женскиот фудбал.

Останатата помош ќе биде достапна во форма на заеми без камати кои можат да достигнат до 35% од приходите на секоја федерација. Минималниот износ на секој заем ќе биде 500.000 УСД, а максимумот 5 милиони УСД. Покрај тоа, секоја конфедерација ќе може да добие заем од 4 милиони американски долари.

„Ние ќе извршиме строга контрола врз користењето на средствата, заедно со ревизиите, и ќе има многу јасни услови за враќање на средствата“, истакна Инфантино.

За финансирање на оваа помош, ФИФА ќе повлече свои резерви, имено 328 милиони долари за директни субвенции и 556 милиони долари за финансирање на заеми, рече Инфантино.

“Клубовите и федерациите се во вистинска опасност. Во некои делови на светот, фудбалот сè уште не продолжи. Треба да им помогнеме”, додаде тој.

Доколку преземете содржина од оваа страница, во целост сте се согласиле со нејзините Услови за користење.