Пожарот што денеска утро го зафати манастирот „Прохор Пчински“ на македонско – српската граница е веќе изгаснат, јавуваат српските медиуми.
Портпаролот на Полициската управа во Врање, Драган Стаменковиќ за новинската агенција Бета изјавил дека во пожарот нема повредени.
Епископот врањски Пахомија изјавил за црковното Радио Искон дека пожарот на кровната контрсукција од Кралевиот конак го забележал и пријавил настојникот на манастирот „Св. Прохор Пчински“, Николај, кој заедно со гостите во манастирот се обидел да го изгасне користејќи противпожарни апарати, но дека не успеал бидејќи пожарот брзо се ширел.
Се претпоставува дека пожарот на кровната конструкција се појавил во близина на оџакот, а оттаму се проширил на кровот, а потоа и на целиот конак кој во голем дел е изграден од дрво.
За сега не е позната причината за избувнување на пожарот, како и ни колкава штета е направена. Манастирот се наоѓа на непристапен терен покрај реката Пчиња во подножјето на планината Козјак.
