Франција повика во неделата на „итно и трајно“ примирје во војната меѓу Израел и палестинското радикално исламистичко движење Хамас, велејќи дека е длабоко загрижена од ситуацијата во Појасот Газа.
Министерката за надворешни работи Кетрин Колона истакна дека има премногу цивилни жртви. Велика Британија и Германија претходно повикаа на „одржлив прекин на огнот“, но не рекоа дека тоа треба да се спроведе „итно“.
Во соопштението на француското Министерство за надворешни работи пред посетата на министерот за надворешни работи на Израел се вели дека министерката ќе повика на примирје што треба „да доведе до траен прекин на огнот со цел ослободување на сите заложници и доставување помош за Газа“.
Израелскиот министер за надворешни работи Ели Коен рече дека прекинот на огнот би бил грешка, опишувајќи го како подарок за Хамас.
Но, Коен рече и дека Франција може да одигра важна улога во спречувањето на ескалација на регионалните тензии. Тој додаде дека иако Израел „нема намера да отвори нов фронт“ на својата северна граница со Либан, ќе стори „сѐ што може“ за да ги заштити израелските граѓани. Израел редовно разменува оган со вооружени групи во јужен Либан, најчесто со шиитското движење Хезболах.
Покрај средбата со семејствата на француските граѓани кои Хамас ги држеше како заложници, Кетрин Колона планира во понеделникот да го посети и Либан.
Либански Хезболах неколкупати ги нападна израелските сили во близина на границата. Израелската војска соопшти дека во неделата имало отворање оган од Либан кон северен Израел, додавајќи дека израелската артилерија ги погодила изворите на огнот.
