Францускиот министер за правосудство Ерик Дупон-Морети ќе одговара поред посебниот суд поради сомневања дека бил вмешан во судир на интереси во два случаи, соопшти во понеделникот портпаролката на Касициониот суд.
Дупон-Морети, кој пред да биде именуван од претседателот Емануел Макрон во 2020 година за министер за правосудство, беше еден од најпознатите француски адвокати за кривично право, осомничен е дека ја користел својата позиција во владата за да се пресмета со судиите кои истражувале некои негови истакнати во јавноста клиенти и пријатели, вклучително и поранешниот француски претседател Николас Саркози.
Министерот ги отфрла обвинувањата, а неговиот адвокат Реми Лорен, изјавил за Reuters дека веднаш ќе се жали на одлуката да биде отворен судски процес.
„Министерот е многу сигурен во себеси. Нема да поднесе оставка“, изјавил Лорен.
„Секогаш велев дека легитимитетот им го должам на претседателот на Републиката и на премиерката и само на нив“, изјави претходно деновиве Дупон-Морети.
Истрагата е отворена во јануари од 2021 година врз основа на обвинение на синдикатот на судиите и здружението за борба против корупцијата Anticor кои го обвинија за два случаи на конфликт на интереси.
Правосудното тело пред кое ќе одговара, Судот на правдата на Републиката, надлежен за кривични дела или прекршоци кои ги прават членовите на владата додека се на должност. Од воспоставувањето во 1993 година овој суд одржал само осум формални судења. Пред судот досега беа исправени осум министри и двајца државни секретари, но ниеден додека биле на должност во владата.
Меѓу нив е и поранешната француска министерка за финансии и челничка на Меѓународниот монетарен фонд (ММФ – IMF) и актуелна претседателка на Европската централна банка (ECB), Кристин Лагард, Таа беше прогласена виновна за негрижа, но не беше казнета.
Судскиот совет на Судот на правдата на Републиката го сочинуваат пратеници, сенатори и судии од Касациониот суд, највисокиот суд во Франција.