Премиерот на Косово, Авдулах Хоти, тврди дека нема да има Заедница на српски општини (ЗСО) со извршни овластувања, дека прашањето повеќе не постои, но дека е создадена обврска.
Хоти утрово на прес-конференција соопштил дека не очекува прашањето за формирање на ЗСО да го блокира дијалогот меѓу Белград и Приштина.
– Беше договорено темата ЗСО да биде затворена и доколку има блокада на дијалогот, тоа нема да биде наша одговорност – вели Хоти.
Тој наведува дека косовскиот устав бил прекршен во 2013 година, кога бил ратификуван договорот за формирање, како што вели, Здружението на општини со српско мнозинство.
– Доколку се постигне сеопфатен договор, тој мора да биде ратификуван во Собранието на Косово, но едно е сигурно дека ниту еден договор нема да го загрози унитарниот карактер на Косово, ниту, пак, здружението или ЗСО ќе има извршни овластувања – рече Хоти.
