Инфлацијата во Германија забавила во ноември

 

Инфлацијата во Германија забавила во ноември, покажаа прелиминарните проценки на Destatis објавени во средата, како одраз на посилниот пад на цените на енергијата, со континуиран раст на цените на услугите и храната.

Потрошувачките цени во најголемата европска економија се зголемиле во ноември за 3,2 отсто во споредба со истиот период минатата година, покажуваат прелиминарните проценки на заводот за статистика, кој конечните податоци ќе ги објави на 8. декември. Стапката на инфлација на тој начин се спуштила на најниско ниво од јуни 2021 година, кога изнесуваше 2,4 отсто, се наведува во соопштението.

Прелиминарната оценка покажува значително слабеење на потрошувачките цени на годишно ниво, бидејќи инфлацијата во октомври изнесуваше 3,8 отсто. На месечно ниво, цените паднаа за 0,4 отсто, според прелиминарните и моментално достапните податоци, откако во октомври останаа непроменети во однос на претходниот месец.

Статистичарите проценуваат дека базичната инфлација, која ги исклучува цените на енергијата и храната, исто така, забавила, од 4,3 на 3,8 отсто.

Најголема тег за потрошувачките цени во целина биле енергенсите и моторните горива, па така домаќинствата во ноември морале да издвојат 4,5 отсто помалку за нив од претходната година. Тие во октомври биле поевтини за 3,2 отсто во однос на истиот период лани, покажуваат табелите на заводот за статистика.

Статистичарите предупредуваат на влијанието на високата споредбена основа во минатата година кога цените на енергенсите беа многу високи.

Според првите проценки, услугите чинеле 3,4 отсто повеќе од ноември минатата година. Во октомври тие се за 3,9 отсто повисоки во однос на истиот месец лани.

Незначително пораснале и цените на стоките, за 3 отсто. Во октомври тие се повисоки за 3,6 отсто.

Цените на храната пораснале за 5,5 отсто, по растот од 6,1 отсто во октомври.

Хармонизираниот индекс на потрошувачките цени (HICP), кој се користи за споредба со другите земји од Европската унија, во ноември покажа пораст на цените од 2,3 отсто во однос на истиот месец лани. Во октомври, според HICP, цените пораснале за 3 отсто.

На месечно ниво, HICP покажа пад на цените од 0,7 отсто во ноември, по падот од 0,2 отсто во октомври, покажуваат прелиминарните податоци на Destatis.

Доколку преземете содржина од оваа страница, во целост сте се согласиле со нејзините Услови за користење.