Италијанските навивачи експресно ги купија билетите за мундијалското полуфинале во плејофот со Македонија на 24 март во Палермо, па за два дена откако прво купуваа приврзаниците со членски карти, а потоа останатите, продадени се 26.000 влезници. Италијанската федерација (ФИГЦ) објави дека во првиот дел од продажбата за верните членови продадени се 6.000 влезници, а вчера откако почна слободната продажба на билети продадени се дополнителни 20.000 влезници со што е исполнет капацитетот од 75 отсто колку што во моментов дозволуваат ковид-регулативите на Апенините.
За неполни три недели Македонија гостува на „Ренцо Барбера“, но постои сѐ уште можност да се дозволи полн капацитет на стадионот, па ако такво нешто се случи, а од поодамна се најавува, дополнителен контингент на влезници ќе бидат пуштени во продажба и тие веќе извесно експресно ќе бидат купени.
