Зајакнување на системот за вооружување во Европа и вооружувањето на Украина се од клучно значење за време на руската воена интервенција, согласни беа во средата челниците на некои европски земји и шефот на НАТО на панелот за безбедност во Европа за време на годишниот Светски економски форум во Давос.
Холандската министерка за одбрана Кајса Олонгрен рече дека Европската унија би можела да ги здружи силите за да обезбеди комплексни системи вооружувања кои ѝ се потребни на Украина во војната против Русија.
Белгискиот премиер Александар Де Кру рече дека е потребна поголема координација при одлучувањето кои системи за оружје и се потребни на Европската унија како долгорочна безбедносна цел.
Генералниот секретар на НАТО, Јенс Столтенберг, рече дека „најдобар начин за поддршка на Украина е да се обезбеди оружје, што сојузниците го прават на високо ниво„ и повтори дека иако ја поддржува Украина, НАТО нема да биде дел од конфликтот.
Отворајќи ја седницата, шефот на претседателската администрација на Украина, Андриј Ермак, им порача на државите дека не мора да водат војна, но ги повика да му помогнат на Киев да ја води.
Предложи формирање меѓународна советодавна работна група која ќе понуди безбедносни гаранции за Украина, вклучително и обезбедување оружје, финансирање на обновата и одбраната, задржување на санкциите кон Русија и пристапување во ЕУ.
