Во последниот саботен натпревар од 16. коло на шпанското фудбалско првенство, Мајорка пред своите гледачи ја совлада Севиља со 1-0 во меч на две екипи кои минуваат низ резултатска криза, без победа на девет првенствени натпревари.
Првата првенствена победа на Мајорка во последните три месеца ѝ ја донесе Сајл Ларин со гол во 11. минута. Сепак, останува впечатокот дека Севиља беше оштетена за поништениот гол во 63. минута. Стрелец беше Адриа Педроса, по чиј удар топката го закачи Јусеф Ен Несири на патот кон голот, малку го промени правецот и заврши во мрежата. Главниот судија Хавиер Алберола Рохас го прегледал видеото на сигнал од ВАР просторијата и заклучи дека топката Ен Несири го удрила во лактот и го поништи голот, иако впечатокот, врз основа на движењата на напаѓачот на Севиља, беше дека топката се одби од грбот на Мароканецот.
Покрај тоа, најзаслужен за тоа што мрежата на Мајорка остана недопрена беше српскиот голман Предраг Рајковиќ, кој имаше неколку многу тешки одбрани при изгледни ситуации за гостинските фудбалери.
Мајорка стигна до 14 бода и се искачи на 15. место и ја прескокна Севиља која е на 16. позиција со бод помалку.
Фудбалерите на Реал Сосиедад славеа со убедливи 3:0 на гостувањето кај Виљареал. Сите три гола гостите ги постигнаа на крајот од првото полувреме. За 1:0 стрелец беше Микел Мерино во 38. минута. Три минути подоцна Мартин Зубименди ја удвои предноста на баскискиот тим, а за 3-0 стрелец беше Јапонецот Такефуса Кубо во четвртата минута од судиското продолжение.
Реал Сосиедад привремено го зазеде петтото место со 29 бодови, додека Виљареал е на 13. позиција со 16 бодови.
Фудбалерите на Бетис и Реал Мадрид одиграа 1:1 пред повеќе од 50.000 гледачи на стадионот „Бенито Виљамарин“ во Севиља. Лидерите во Ла Лига поведоа во 53. минута кога Џуд Белингем ја пронајде мрежата за својот 12. првенствен гол сезонава. Аитор Руибал израмни на 1:1 во 66. минута.
Реал Мадрид третпат сезонава освои само бод и е на врвот на табелата со 39 бодови. Бод помалку, но и натпревар помалку има Жирона, која во недела на “Олимпискиот стадион“ во каталонската престолнина ѝ гостува на третопласираната Барселона со 34 бода.
Бетис е на седмата позиција со 26 бодови.
Во првиот натпревар од саботниот распоред, Лас Палмас го победи Алавес со 1:0 на гостувањето во Виторија. Победата на гостите им ја донесе Киријан Родригез со гол во 31. минута од натпреварот. Во вториот дел на Алавес му беа поништени два погодока по интервенција на ВАР, и во двата слуачи поради офсајд позиции.
Лас Палмас сега е осми на рабелата со 24 бодови, а Алавес е 12-ти со 16 бодови.
