Бугарски национален интерес е Македонија да се приклучи кон Европската унија, пат на кој следен чекор е почеток на преговори со Скопје. Отворањето на преговорите со Македонија треба да биде важна цел за бугарската дипломатија, изјави бугарскиот министер за иновации Даниел Лорер за јавното радио БНР.
Лорер нагласи дека бугарски национален интерес е и Бугарија да се претвори во исклучително богата и социјално праведна држава, која е опколена со исти такви соседи. Бугарскиот министер за иновации посочи дека за соседите на Бугарија патот кон богатството и социјалната правда минува низ членството во ЕУ.
„Со еден продолжен и позитивен дијалог со македонската страна ќе бидат постигнати условите, не само историски, туку и економски, академски, како и културни за врските меѓу двете држави. Тоа треба да се случи за да се почуствува секоја од двете страни далеку посигурна во тој дијалог“, нагласи Лорер.
За изјавата на Слави Трифонов дека Бугарија да ѝ дозволи влез на Македонија во ЕУ, доколку САД ги укинат визите за бугарските граѓани и земјата веднаш да стане членка на Шенген зоната, рече дека мислењето на Трифонов е интересно, бидејќи на тој начин тој поврзува еден билатерален спор со ЕУ и САД.
