Драган Крстев од струмичко Ангелци, Дејан Коцев од Свети Николе, Кико Маневски од делчевско, Трајче Трајков од Кавадарци заедно со Ендрју Ворт од Англија, од 13 мај се во добротворна патувачка мисија низ 15 европски држави за да ја анимираат јавноста за хуманост и собираат донации за помош, објави Дрнка.мк.
Тргнаа со две англиски такси возила со кои треба да извозат околу 4000 километри и да ги поттикнат граѓаните на попатните станици по европските држави, да се приклучат во добротворната организација и мисија.
Станува збор за ,,Black Cab – Europe Charity Trip“ која има за цел да ги потикнат граѓаните кон солидарност и донирање средства за болницата за деца Great Ormond Street во Англија но и за одредено семејство или институција на која им е потребна помош и во Македонија. Целата рута низ кои се држави ќе поминат овие хуманисти чија цел е да промовираат разбирање, емпатија, солидарност меѓу луѓето можете да ја видите ТУКА.
,,Нашето патување започна од Лондон и треба да поминеме 15 земји во Европа при што се очекува да извозиме околу 4 000 км. Патувањето ќе трае приближно 2 недели. Ќе застанеме на различни локации и знаменитости, ќе се обидеме да го ангажираме локалното население каде ќе застанува за да ја подигнеме свеста за добротворната организација и нашата мисија,, вели Драган Крстев од струмичко Ангелци кој пред околу три години со „101“ тргна од Струмица до Лондон
,,Со ова наше патување сакаме да упатиме апел до сите, да донираат и да помогаат во заедницата. Сѐ уште немаме одлучено кому во Македонија ќе ги доделиме собраните средства но еве упатувам апел до сите што сакаат да донираат тоа да го направат на платформата GOFUNDME“ изјави Драган Крстев.
