Селекторот на македонската фудбалска репрезентација Благоја Милевски во средата вчерта на официјалната прес-конференција во пресрет на утрешниот натпревар против Ерменија ги сподели своите очекувања за мечот во Ереван од квалификациите за Светското првенство 2022 во Катар.
„Сметам дека не очекува одличен натпревар. Двете селекции имаат свои шанси за второто место, а победа е опција и за нас и за Ерменија. Ова ќе биде многу поразличен меч од тој во Скопје. На домашен терен ја имавме доминацијата, но сега очекувам сосема поразличен дуел, отворен на двете страни, затоа што победата е важна за двете селекции“, рече Милевски.
Поради повреди Милевски нема да може да смета на неколкумина стандардни репрезентативци, но очекува целиот тим да го даде својот максимум.
„Се разбира дека отсуствата поради повреди на играчи од калибар како Адеми и Барди, а сега и Стефан Ристовски, Ракип, Јаховиќ и Николов ни создаваат проблеми. Но, сигурен сум дека сите оние што ќе настапат ќе го дадат максимумот на овој натпревар. Има влијание тој недостаток, особено што не можам да сметам на сите играчи од средниот ред. Македонија е во фаза на создавање на тим и ни треба костурот на селекцијата во наредните четири години. Но, сега не се откажуваме и секоја шанса за тоа второ место ќе се обидеме да ја искористиме“, посочи Милевски.
